ہو چکا جو کہ مقدر میں تھا درماں ہونا

ہو چکا جو کہ مقدر میں تھا درماں ہونا

اب ترے ہاتھ ہے مشکل مری آساں ہونا

تھا جو مقسوم میں شرمندۂ احساں ہونا

غیر کے ہاتھ رہا دفن کا ساماں ہونا

حسن کا عشق کی وادی میں نمایاں ہونا

رمز تھا دن کو سر طور چراغاں ہونا

لذت درد جراحت تو مرے دل سے نہ پوچھ

پہلوئے زخم میں لازم تھا نمکداں ہونا

اک قیامت کا سماں تھا ترا اے صبح وطن

پردۂ شام غریباں کا نمایاں ہونا

خانہ بربادیاں ہر سمت سے گھیرے ہیں مجھے

در و دیوار پہ لکھا ہے بیاباں ہونا

امتحاں گاہ محبت میں نہ جانے کیا ہو

قہر کا سامنا ہے تیغ کا عریاں ہونا

آ رہی ہیں یہ امیدوں کی صدائیں پیہم

گو سفر سخت ہے لیکن نہ ہراساں ہونا

میری تربت بھی بنی ایسی زمیں پہ عالمؔ

جس کی تقدیر میں لکھا تھا بیاباں ہونا

ho chuka jo ke muqaddar mein tha darman hona

ab tire hath hai mushkil miri asan hona

tha jo maqsum mein sharminda-e-ehsan hona

ghair ke hath raha dafn ka saman hona

husn ka ishq ki wadi mein numayan hona

ramz tha din ko sar-e-tur charaghan hona

lazzat-e-dard jarahat to mire dil se na puchh

pahlu-e-zakhm mein lazim tha namakdan hona

ik qayamat ka saman tha tira ai subh-e-watan

parda-e-sham-e-ghariban ka numayan hona

khana barbadiyan har samt se ghere hain mujhe

dar-o-diwar pe likha hai bayaban hona

imtihan gah-e-mohabbat mein na jane kya ho

qahr ka samna hai tegh ka uryan hona

a rahi hain ye ummidon ki sadaen paiham

go safar sakht hai lekin na hirasan hona

meri turbat bhi bani aisi zamin pe alam

jis ki taqdir mein likha tha bayaban hona