ہو گر ایسے ہی مری شکل سے بیزار بہت

ہو گر ایسے ہی مری شکل سے بیزار بہت

تم سلامت رہو بندے کے خریدار بہت

ہم دگر جب خفگی آئی تو جھگڑا کیا ہے

تم کو خواہندہ بہت ہم کو طرح دار بہت

آج کے رونے میں جی ڈوب چلا تھا لیکن

نالۂ دل نے رکھا مجھ کو خبردار بہت

شیخ مجھ کو نہ ڈرا گور کے اندھیارے سے

ہجر کی کاٹی ہیں میں نے تو شب تار بہت

دیکھیے اب کی تب عشق سے کیوں کر بیتے

غالب آیا ہے طبیعت پہ یہ آزار بہت

سچ کہو قتل پہ کس کے یہ کمر باندھی ہے

ان دنوں ہاتھ میں تم رکھتے ہو تلوار بہت

قائمؔ آتا ہے مجھے رحم جوانی پہ تری

مر چکے ہیں اسی آزار کے بیمار بہت

ho gar aise hi miri shakl se bezar bahut

tum salamat raho bande ke kharidar bahut

ham digar jab khafagi ai to jhagra kya hai

tum ko khwahnda bahut ham ko tarah dar bahut

aj ke rone mein ji dub chala tha lekin

nala-e-dil ne rakha mujh ko khabardar bahut

shaikh mujh ko na dara gor ke andhiyare se

hijr ki kati hain main ne to shab-e-tar bahut

dekhiye ab ki tab ishq se kyun kar bite

ghalib aya hai tabiat pe ye azar bahut

sach kaho qatl pe kis ke ye kamar bandhi hai

in dinon hath mein tum rakhte ho talwar bahut

qaim ata hai mujhe rahm jawani pe tiri

mar chuke hain isi azar ke bimar bahut