ہو گئے مضطر دیکھتے ہی وہ ہلتی زلفیں پھرتی نظر ہم

ہو گئے مضطر دیکھتے ہی وہ ہلتی زلفیں پھرتی نظر ہم

دیتے ہیں دل اک آفت جاں کو تھامے ہوئے ہاتھوں سے جگر ہم

غیر کو گر وہ پیار کریں گے اپنے لہو میں ہوں گے تر ہم

ڈال ہی دیں گے ان کے قدم پر کاٹ کر اپنے ہاتھ سے سر ہم

صلح ہوئی تو نالے کھینچے یوں کرتے ہیں سب کو خبر ہم

پیٹتے ہیں سینے کا ڈھنڈھورا دیتے ہیں دل بار دگر ہم

اور ملیں گے چھوڑ نہ دیں گے سن کے صدائے مرغ سحر ہم

حلقہ دونوں ہاتھ کا اپنے ڈال رکھیں گے گرد کمر ہم

دل کے اندر طور کے اوپر چشم صنم میں عین حرم میں

تیری ہی صورت تیری ہی مورت پوجنے جائیں تجھ کو کدھر ہم

راز چھپتے تو آغاز اچھا بھید کھلے تو انجام اچھا

مثل سکندر بھیس بدل کر جاتے ہیں بن کر نامہ بر ہم

اندازہ گو کر ہی چکے ہیں آ جاتی ہے مٹھی میں یہ

آج مگر بے پردہ کریں گے دیکھیں گے پتلی سی کمر ہم

لاتے ہی کچھ رنگ جوانی آنکھ سے یوں کیں آنکھ نے باتیں

آؤ دکھائیں سب کو گھاتیں شعبدہ گر تم جادوگر ہم

کہتی ہیں زلفیں مشکیں کس لیں کوئی جو ڈالے ہاتھ کمر میں

پھیل کے سوؤ ڈر کیا تم کو گشت کریں گے گرد کمر ہم

لطف بڑا ہو اور مزا ہو اس کے عوض گر آپ کو پائیں

بیٹھ کے اپنے گھر کے اندر ڈھونڈھ رہے ہیں یار کا گھر ہم

تم کو نزاکت اور خدا دے ہم کو لذت اور خدا دے

پائنچے تم چٹکی سے اٹھا لو تھامے ہوئے چلتے ہیں کمر ہم

اٹھتا جوبن جھکتی گردن دبتی باتیں رکتی گھاتیں

ہائے نہ کیوں سو جاں سے فدا ہوں ان چاروں پر اٹھ پھر ہم

سایہ بن کر ساتھ چلیں گے ساتھ پھریں گے ساتھ رہیں گے

اپنے گھر میں غیر کے دل میں جاؤ جدھر تم آئیں ادھر ہم

جلد تم اٹھو دوڑ کے آؤ ہم کو تھامو ہم کو سنبھالو

گرتے ہیں مثل اشک زمیں پر اٹھتے ہیں شکل درد جگر ہم

سب سے چھڑا کر لائے اڑا کر کیا نہ رکھیں گے دل میں چھپا کر

رہنے بسنے چلنے پھرنے تم کو خدا کا دیں گے گھر ہم

منہ جو کھلے گا رنج بڑھے گا ہم سے نہ بولو ہم کو نہ چھیڑو

کاہیدہ تن آزردہ جان آشفتہ دل خستہ جگر ہم

یہ تو چھپر کھٹ چھوٹا سا ہے پہلو میں تم سوؤ گے کیوں کر

آؤ لٹا لیں سینے پر ہم تم کو سلا لیں چھاتی پر ہم

رنج گر آیا ہو تو بھلا دے پیار بڑھا دے ہم سے ملا دے

دیکھ کے ان کا جوبن ابھرا میں نے کہا یہ مال ہے اچھا

بولے وہ کیا تم لوٹ ہی لو گے گود میں یوں آ جائیں اگر ہم

ٹھہری ہے باہم لطف کی بازی پہلے جو پائے جیت اسی کی

وصل کی شب ہے ڈھونڈ رہے ہیں دل وہ ہمارا ان کی کمر ہم

روز نئے دل لائیں کہاں سے ایسے تحفے پائیں کہاں سے

چاٹ پڑی ہے تم کو دلوں کی لوٹنے جائیں کس کا گھر ہم

غیر کے بر میں ان کو دیکھا خاک میں جائے ایسا نظارہ

ہاتھ میں کمبخت آ نہیں سکتا توڑتے ورنہ تار نظر ہم

نشو و نما پائی ہے دکن میں قدر ہماری کیوں کر ہوگی

گھر کی مرغی دال برابر کس کو دکھائیں اپنا ہنر ہم

کیوں نہ کرے دیوانہ کسی کو شرم کی عادت حسن کی شوخی

ہو گئے مائلؔ دیکھ کے مائل اٹھتا جوبن جھکتی نظر ہم

ho gae muztar dekhte hi wo hilti zulfen phirti nazar ham

dete hain dil ik afat jan ko thame hue hathon se jigar ham

ghair ko gar wo pyar karenge apne lahu mein honge tar ham

dal hi denge un ke qadam par kat kar apne hath se sar ham

sulh hui to nale khinche yun karte hain sab ko khabar ham

pitte hain sine ka dhandhora dete hain dil bar-e-digar ham

aur milenge chhor na denge sun ke sada-e-murgh-e-sahar ham

halqa donon hath ka apne dal rakhenge gard kamar ham

dil ke andar tur ke upar chashm-e-sanam mein ain haram mein

teri hi surat teri hi murat pujne jaen tujh ko kidhar ham

raz chhupte to aghaz achchha bhed khule to anjam achchha

misl-e-sikandar bhes badal kar jate hain ban kar nama bar ham

andaza go kar hi chuke hain a jati hai mutthi mein ye

aj magar be parda karenge dekhenge putli si kamar ham

late hi kuchh rang-e-jawani ankh se yun kin ankh ne baten

ao dikhaen sab ko ghaten shobada gar tum jadugar ham

kahti hain zulfen mushkin kis len koi jo dale hath kamar mein

phail ke soo dar kya tum ko gasht karenge gard kamar ham

lutf bara ho aur maza ho us ke ewaz gar ap ko paen

baith ke apne ghar ke andar dhundh rahe hain yar ka ghar ham

tum ko nazakat aur khuda de ham ko lazzat aur khuda de

painche tum chutki se utha lo thame hue chalte hain kamar ham

uthta joban jhukti gardan dabti baten rukti ghaten

hae na kyun so jan se fida hun in charon par uth phir ham

saya ban kar sath chalenge sath phirenge sath rahenge

apne ghar mein ghair ke dil mein jao jidhar tum aen idhar ham

jald tum utho daur ke ao ham ko thamo ham ko sambhalo

girte hain misl-e-ashk zamin par uthte hain shakl-e-dard-e-jigar ham

sab se chhura kar lae ura kar kya na rakhenge dil mein chhupa kar

rahne basne chalne phirne tum ko khuda ka denge ghar ham

munh jo khulega ranj barhega ham se na bolo ham ko na chhero

kahida tan azurda jan ashufta dil-e-khasta jigar ham

ye to chhappar khit chhota sa hai pahlu mein tum sooge kyun kar

ao luta len sine par ham tum ko sula len chhati par ham

ranj gar aya ho to bhula de pyar barha de ham se mila de

dekh ke un ka joban ubhra main ne kaha ye mal hai achchha

bole wo kya tum laut hi loge god mein yun a jaen agar ham

thahri hai baham lutf ki bazi pahle jo pae jit usi ki

wasl ki shab hai dhund rahe hain dil wo hamara un ki kamar ham

roz nae dil laen kahan se aise tohfe paen kahan se

chat pari hai tum ko dilon ki lautne jaen kis ka ghar ham

ghair ke bar mein un ko dekha khak mein jae aisa nazara

hath mein kambakht a nahin sakta torte warna tar-e-nazar ham

nashw-o-numa pai hai dakan mein qadar hamari kyun kar hogi

ghar ki murghi dal barabar kis ko dikhaen apna hunar ham

kyun na kare diwana kisi ko sharm ki adat husn ki shokhi

ho gae mail dekh ke mail uthta joban jhukti nazar ham