ہوئے آج بوڑھے جوانی میں کیا تھے

ہوئے آج بوڑھے جوانی میں کیا تھے

جب اٹھے تھے زانو سے ہاتھ آشنا تھے

جہاں کی تو ہر چیز میں اک مزہ تھا

نہ سمجھے کہ کس شے کے ہم مبتلا تھے

نہ کافر سے خلعت نہ زاہد سے الفت

ہم اک بزم میں تھے پہ سب سے جدا تھے

نہ تھا میرے جنگل میں آزاد کوئی

بگولے بھی پابند زلف ہوا تھے

مزار غریب تأسف کی جا ہے

وہ سوتے ہیں پھرتے جو کل جا بہ جا تھے

بنا کر بگاڑا ہمیں کیوں جہاں میں

یہ سب حرف کیا سہو کلک قضا تھے

کئے آخری نالہ دو چار میں نے

وہی نالہ بانگ شکست درا تھے

خدا جانے دنیا میں کس کو تھی راحت

ہوسؔ ہم تو جینے سے اپنے خفا تھے

hue aj burhe jawani mein kya the

jab uthe the zanu se hath ashna the

jahan ki to har chiz mein ik maza tha

na samjhe ke kis shai ke ham mubtala the

na kafir se khilat na zahid se ulfat

ham ik bazm mein the pe sab se juda the

na tha mere jangal mein azad koi

bagule bhi paband-e-zulf hua the

mazar gharib tasaf ki ja hai

wo sote hain phirte jo kal ja ba ja the

bana kar bigara hamen kyun jahan mein

ye sab harf kya saho kilk-e-qaza the

kiye akhiri nala do char main ne

wahi nala bang-e-shikast-e-dara the

khuda jane duniya mein kis ko thi rahat

hawas ham to jine se apne khafa the