ہوئے عشق میں امتحاں کیسے کیسے

ہوئے عشق میں امتحاں کیسے کیسے

پڑے مرحلے درمیاں کیسے کیسے

رہے دل میں وہم و گماں کیسے کیسے

سرا میں ٹکے کارواں کیسے کیسے

گھر اپنا غم و درد سمجھے ہیں دل کو

بنے میزباں میہماں کیسے کیسے

شب ہجر باتیں ہیں دیوار و در سے

ملے ہیں مجھے رازداں کیسے کیسے

دکھاتا ہے دن رات آنکھوں کو میری

سیاہ و سفید آسماں کیسے کیسے

جو کعبے سے نکلے جگہ دیر میں کی

ملے ان بتوں کو مکاں کیسے کیسے

فرشتے بھی گھائل ہیں تیر ادا کے

نشانہ ہوئے بے نشاں کیسے کیسے

جو خنجر رکا چڑھ گئی ان کی تیوری

وہ بگڑے دم امتحاں کیسے کیسے

ادھر موت ادھر وہ دم نزع آئے

اکٹھا ہوئے مہرباں کیسے کیسے

کبھی بجلی تڑپی کبھی آندھی آئی

بڑھے دشمن آشیاں کیسے کیسے

مرے جرم محشر میں کرتی ہے افشا

مرے منہ پہ میری زباں کیسے کیسے

محبت کے ہاتھوں ہوئے ظلم کیا کیا

گئے جان سے نوجواں کیسے کیسے

نشاں مٹ گئے نام پھر بھی ہیں باقی

جواں تھے تہہ آسماں کیسے کیسے

کروں یاد کس کس کو کس کس کو روؤں

حفیظؔ اٹھ گئے مہرباں کیسے کیسے

hue ishq mein imtihan kaise kaise

pare marhale darmiyan kaise kaise

rahe dil mein wahm-o-guman kaise kaise

sara mein tike karwan kaise kaise

ghar apna gham-o-dard samjhe hain dil ko

bane mezban mehman kaise kaise

shab-e-hijr baten hain diwar-o-dar se

mile hain mujhe razdan kaise kaise

dikhata hai din rat ankhon ko meri

siyah-o-safed asman kaise kaise

jo kaabe se nikle jagah der mein ki

mile un buton ko makan kaise kaise

farishte bhi ghayal hain tir-e-ada ke

nishana hue be nishan kaise kaise

jo khanjar ruka charh gai un ki tewri

wo bigre dam-e-imtihan kaise kaise

idhar maut idhar wo dam-e-nazaa ae

ikattha hue mehrban kaise kaise

kabhi bijli tarpi kabhi andhi ai

barhe dushman-e-ashiyan kaise kaise

mire jurm-e-mahshar mein karti hai ifsha

mire munh pe meri zaban kaise kaise

mohabbat ke hathon hue zulm kya kya

gae jan se naujawan kaise kaise

nishan mit gae nam phir bhi hain baqi

jawan the tah-e-asman kaise kaise

karun yad kis kis ko kis kis ko roun

hafiz uth gae mehrban kaise kaise