ہوئی تاثیر آہ و زاری کی

ہوئی تاثیر آہ و زاری کی

رہ گئی بات بے قراری کی

شکوۂ دشمنی کریں کس سے

واں شکایت ہے دوست داری کی

مبتلائے شب فراق ہوئے

ضد سے ہم تیرہ روزگاری کی

یاد آئی جو گرمجوشیٔ یار

دیدۂ تر نے شعلہ باری کی

کیوں نہ ڈر جاؤں دیکھ کر وہ زلف

ہے شب ہجر کی سی تاریکی

یاس دیکھو کہ غیر سے کہہ دی

بات اپنی امیدواری کی

بس کہ ہے یار کی کمر کا خیال

شعر کی سوجھتی ہے باریکی

کر دے روز جزا شب دیجور

ظلمت اپنی سیاہ کاری کی

تیرے ابرو کی یاد میں ہم نے

ناخن غم سے دل فگاری کی

قتل دشمن کا ہے ارادہ اسے

یہ سزا اپنی جاں نثاری کی

کیا مسلماں ہوئے کہ اے مومنؔ

حاصل اس بت سے شرمساری کی

hui tasir ah-o-zari ki

rah gai bat be qarari ki

shikwa-e-dushmani karen kis se

wan shikayat hai dost dari ki

mubtala-e-shab-e-firaq hue

zid se ham tira rozgari ki

yad ai jo garmjoshi-e-yar

dida-e-tar ne shola bari ki

kyun na dar jaun dekh kar wo zulf

hai shab-e-hijr ki si tariki

yas dekho ke ghair se kah di

bat apni umidwari ki

bas ke hai yar ki kamar ka khayal

sher ki sujhti hai bariki

kar de roz-e-jaza-e-shab dijaur

zulmat apni siyah kari ki

tere abru ki yad mein ham ne

nakhun-e-gham se dil figari ki

qatl dushman ka hai irada use

ye saza apni jan nisari ki

kya musalman hue ke ai momin

hasil us but se sharmsari ki