ہمیں چھوڑ کیدھر سدھارے پیارے

ہمیں چھوڑ کیدھر سدھارے پیارے

ہیں مشتاق دیدے تمہارے پیارے

ان آنکھوں کو بادام و نرگس سے نسبت

ادھر ٹک تو دیکھو ہمارے پیارے

یہ سرو سہی اور شمشاد سارے

تمہارے قد اوپر سے وارے پیارے

یہ خوبان ہندی و چین و چگل بھی

تصدق گئے تجھ پہ آرے پیارے

تجھے ٹکٹکی باندھ سب تک رہے ہیں

فلک تک بھی بن آنکھ تارے پیارے

لباس زر و گل کی حاجت نہیں ہے

تجھے اے خدا کے سنوارے پیارے

تری نیچی ان چتونوں کے ٹھگوں نے

بدیسی بناؤ ہی مارے پیارے

اسے سائی دینا اور اس کو بدھائی

یہ چھل بل بتاؤ تو بارے پیارے

پڑو پٹکی ایسے تمہارے گنوں پر

تمہیں ہم تو سمجھا کے ہارے پیارے

وہ مجلس کی مجلس جمی آن کر پھر

ہوئے ہم ہیں آخر کنارے پیارے

ہٹا طفل دل اظفریؔ کا ترے دیکھ

وہ بادام و آم اور چھہارے پیارے

hamen chhor kidhar sidhare pyare

hain mushtaq dide tumhare pyare

in ankhon ko badam-o-nargis se nisbat

idhar tuk to dekho hamare pyare

ye sarw sahi aur shamshad sare

tumhare qad upar se ware pyare

ye khuban-e-hindi-o-chain-o-chugul bhi

tasadduq gae tujh pe are pyare

tujhe tiktiki bandh sab tak rahe hain

falak tak bhi ban ankh tare pyare

libas-e-zar-o-gul ki hajat nahin hai

tujhe ai khuda ke sanware pyare

tiri nichi in chitwanon ke thagon ne

badesi banao hi mare pyare

use sai dena aur us ko badhai

ye chhal bal batao to bare pyare

paro patki aise tumhare ginon par

tumhen ham to samjha ke hare pyare

wo majlis ki majlis jami an kar phir

hue ham hain akhir kinare pyare

hata tifl-e-dil azfari ka tire dekh

wo badam-o-am aur chhuhare pyare