ہنسوں جوں گل ترے زخموں سے الفت اس کو کہتے ہیں

ہنسوں جوں گل ترے زخموں سے الفت اس کو کہتے ہیں

تو گالی دے دعاؤں میں محبت اس کو کہتے ہیں

نہیں غم حشر کا ہر چند آفت اس کو کہتے ہیں

پھروں یاروں کا منہ دیکھوں قیامت اس کو کہتے ہیں

مرے سیلاب اشکوں میں بہے دنیا، پہ جوں سایا

نہ سرکا میں جگہ سے استقامت اس کو کہتے ہیں

عطا کر سیم شبنم جوں ہنسی صبح اپنے احساں پر

گرہ ہوئی گل کی پیشانی پر عزت اس کو کہتے ہیں

دم روشن دلی جو مارتے ہیں شمع سے زاہد

کٹے سے ناک سرکش تر ہیں ذلت اس کو کہتے ہیں

بگولے سا اڑاتا دھول عزلتؔ وجد کرتا ہے

سر بازار رسوائی میں خلوت اس کو کہتے ہیں

hansun jun gul tire zakhmon se ulfat us ko kahte hain

tu gali de duaon mein mohabbat us ko kahte hain

nahin gham hashr ka har chand afat us ko kahte hain

phirun yaron ka munh dekhun qayamat us ko kahte hain

mire sailab ashkon mein bahe duniya, pe jun saya

na sarka mein jagah se istiqamat us ko kahte hain

ata kar sim shabnam jun hansi subh apne ehsan par

girah hui gul ki peshani par izzat us ko kahte hain

dam-e-raushan dili jo marte hain shama se zahid

kate se nak sarkash tar hain zillat us ko kahte hain

bagule sa urata dhul uzlat wajd karta hai

sar-e-bazar-e-ruswai mein khalwat us ko kahte hain