ہند کی وہ زمیں ہے عشرت خیز

ہند کی وہ زمیں ہے عشرت خیز

کہ نہ زاہد کریں جہاں پرہیز

وجد کرتے ہیں پی کے مے صوفی

مست سوتے ہیں صبح تک شب خیز

رند کیا یاں تو شاہد و مے سے

پارسا کو نہیں گزیر و گریز

سخت مشکل ہے ایسی عشرت میں

خطرِ حشر و بیمِ رستا خیز

ہے غریبوں کو جراتِ فرہاد

ہے فقیروں کو عشرتِ پرویز

عیش نے یاں بٹھا دیا ناقہ

غم نے کی یاں سے رخش کو مہمیز

کوئی یاں غم کو جانتا بھی نہیں

جز غمِ عشق سو ہے عیش آمیز

بادِ صر صر یہاں نسیمِ چمن

نارِ عنصر سے آتشِ گل تیز

بوستاں کی طرح یہاں صحرا

دل کشا، دل پذیر، دل آویز

کوئی پامالِ جورِ چرخ نہیں

کتنی ہے یہ زمین راحت خیز

اثرِ زہرہ اس میں یاں پایا

وہ جو مریخ ہے بڑا خوں ریز

شیفتہ تھام لو عنانِ قلم

یہ زمیں گرچہ ہے ہوس انگیز

hind ki wo zamin hai ishrat khez

ke na zahid karen jahan parhez

wajd karte hain pi ke mai sufi

mast sote hain subh tak shab khez

rind kya yan to shahid-o-mai se

parsa ko nahin guzir-o-gurez

sakht mushkil hai aisi ishrat mein

khatar-e-hashr-o-bim-e-rasta khez

hai gharibon ko jurat-e-farhad

hai faqiron ko ishrat-e-parwez

aish ne yan bitha diya naqa

gham ne ki yan se rakhsh ko mohmiz

koi yan gham ko janta bhi nahin

juz gham-e-ishq so hai aish amez

bad-e-sar sar yahan nasim-e-chaman

nar-e-unsar se atish-e-gul tez

bostan ki tarah yahan sahra

dil kusha, dil pazir, dil awez

koi pamal-e-jaur-e-charkh nahin

kitni hai ye zamin-e-rahat khez

asar-e-zohra is mein yan paya

wo jo mirrikh hai bara khun rez

shefta tham lo inan-e-qalam

ye zamin garche hai hawas angez