ہم نے تو اجاڑ اور بستی دیکھی

ہم نے تو اجاڑ اور بستی دیکھی

دنیا کی سبھی بلند اور پستی دیکھی

صورت پہ خیال اپنی آیا جس دم

یک لحظہ حباب وار پستی دیکھی

کتنوں کے معاش کی درستی دیکھی

کتنوں کی بہ خانہ فاقہ مستی دیکھی

دنیا ہے بسان قحبہ خوش دل غمگیں

روتی ہے کبھی کبھی تو ہنستی دیکھی

جس دست کی میں دراز دستی دیکھی

اس دست کی آخرش شکستی دیکھی

جس نے بستم کیا مکاں کو تعمیر

دیوار پھر اس مکاں کی کھسکتی دیکھی

با وصف عیاں ہے لیک بعضی خلقت

اس شوخ کی دید کو ترستی دیکھی

یہ طرفہ ہے ماجرا کہ کعبۂ دل میں

آفریدیؔ کی ہم نے بت پرستی دیکھی

ham ne to ujar aur basti dekhi

duniya ki sabhi buland aur pasti dekhi

surat pe khayal apni aya jis dam

yak lahza habab war pasti dekhi

kitnon ke maash ki durusti dekhi

kitnon ki ba khana faqa masti dekhi

duniya hai basan-e-qahba khush dil ghamgin

roti hai kabhi kabhi to hansti dekhi

jis dast ki main daraz dasti dekhi

is dast ki akhirash shikasti dekhi

jis ne bastum kiya makan ko taamir

diwar phir is makan ki khisakti dekhi

ba wasf ayan hai lek baazi khilqat

us shokh ki did ko tarasti dekhi

ye turfa hai majra ke kaaba-e-dil mein

afridi ki ham ne but parasti dekhi