ہم نفسو اجڑ گئیں مہر و وفا کی بستیاں

ہم نفسو اجڑ گئیں مہر و وفا کی بستیاں

پوچھ رہے ہیں اہل مہر و وفا کو کیا ہوا

عشق ہے بے گذار کیوں حسن ہے بے نیاز کیوں

میری وفا کہاں گئی ان کی جفا کو کیا ہوا

یہ تو بجا کہ اب وہ کیف جام شراب میں نہیں

ساقی مے کے غمزۂ ہوش ربا کو کیا ہوا

اب نہیں جنت مشام کوچہ یار کی شمیم

نکہت زلف کیا ہوئی باد صبا کو کیا ہوا

تھم گیا دورۂ حیات رک گئی نبض کائنات

عشق و جنوں کی گرمئ ہمہمہ زا کو کیا ہوا

دشت جنوں میں ہو گئی منزل یار بے سراغ

قافلہ کس طرف گیا بانگ درا کو کیا ہوا

نالۂ شب ہے نارسا آہ سحر ہے بے اثر

میرا خدا کہاں گیا میرے خدا کو کیا ہوا

ham nafaso ujar gain mehr-o-wafa ki bastiyan

puchh rahe hain ahl-e-mehr-o-wafa ko kya hua

ishq hai be guzar kyun husn hai be niyaz kyun

meri wafa kahan gai un ki jafa ko kya hua

ye to baja ke ab wo kaif-e-jam-e-sharab mein nahin

saqi-e-mai ke ghamza-e-hosh ruba ko kya hua

ab nahin jannat-e-masham kucha yar ki shamim

nikhat-e-zulf kya hui bad-e-saba ko kya hua

tham gaya daura-e-hayat ruk gai nabz-e-kainat

ishq-o-junun ki garmi-e-hamhama za ko kya hua

dasht-e-junun mein ho gai manzil-e-yar be suragh

qafila kis taraf gaya bang-e-dara ko kya hua

nala-e-shab hai narasa ah-e-sahar hai be asar

mera khuda kahan gaya mere khuda ko kya hua