ہم نہ وحشت کے مارے مرتے ہیں

ہم نہ وحشت کے مارے مرتے ہیں

تیری دہشت کے مارے مرتے ہیں

مار مت بے مروتی سے انہیں

جو مروت کے مارے مرتے ہیں

شکوہ کیا کیجے شام غربت کا

اپنی شامت کے مارے مرتے ہیں

کیا رقیبوں کو ماریے وہ آپ

سب رقابت کے مارے مرتے ہیں

یار سے دور ہیں وطن سے جدا

اس مصیبت کے مارے مرتے ہیں

سیکڑوں اس سے ہیں گے ہم آغوش

لاکھوں حسرت کے مارے مرتے ہیں

کچھ ہماری نہ پوچھئے صاحب

ہم تو غیرت کے مارے مرتے ہیں

ہے عجب زیست منتظرؔ ان کی

جو کہ الفت کے مارے مرتے ہیں

ham na wahshat ke mare marte hain

teri dahshat ke mare marte hain

mar mat be murawwati se unhen

jo murawwat ke mare marte hain

shikwa kya kije sham-e-ghurbat ka

apni shamat ke mare marte hain

kya raqibon ko mariye wo ap

sab raqabat ke mare marte hain

yar se dur hain watan se juda

is musibat ke mare marte hain

saikron us se hain ge ham aghosh

lakhon hasrat ke mare marte hain

kuchh hamari na puchhiye sahab

ham to ghairat ke mare marte hain

hai ajab zist muntazir un ki

jo ke ulfat ke mare marte hain