ہم ہوئے تم ہوئے کہ میرؔ ہوئے

ہم ہوئے تم ہوئے کہ میرؔ ہوئے

اس کی زلفوں کے سب اسیر ہوئے

جن کی خاطر کی استخواں شکنی

سو ہم ان کے نشان تیر ہوئے

نہیں آتے کسو کی آنکھوں میں

ہو کے عاشق بہت حقیر ہوئے

آگے یہ بے ادائیاں کب تھیں

ان دنوں تم بہت شریر ہوئے

اپنے روتے ہی روتے صحرا کے

گوشے گوشے میں آب گیر ہوئے

ایسی ہستی عدم میں داخل ہے

نے جواں ہم نہ طفل شیر ہوئے

ایک دم تھی نمود بود اپنی

یا سفیدی کی یا اخیر ہوئے

یعنی مانند صبح دنیا میں

ہم جو پیدا ہوئے سو پیر ہوئے

مت مل اہل دول کے لڑکوں سے

میرؔ جی ان سے مل فقیر ہوئے

ham hue tum hue ke mir hue

us ki zulfon ke sab asir hue

jin ki khatir ki ustukhwan shikani

so ham un ke nishan tir hue

nahin ate kisu ki ankhon mein

ho ke ashiq bahut haqir hue

age ye be adaiyan kab thin

in dinon tum bahut sharir hue

apne rote hi rote sahra ke

goshe goshe mein ab gir hue

aisi hasti adam mein dakhil hai

ne jawan ham na tifl-e-sher hue

ek dam thi numud bud apni

ya safedi ki ya akhir hue

yaani manind-e-subh duniya mein

ham jo paida hue so pir hue

mat mil ahl-e-dol ke larkon se

mir ji un se mil faqir hue