جان دے دیں گے کرشموں پہ قضا سے پہلے

جان دے دیں گے کرشموں پہ قضا سے پہلے

مر ہی جائیں گے ترے ناز و ادا سے پہلے

رستے ہیں زخم جگر قبل نمک افشانی

مینہ برستا ہے مرے گھر میں گھٹا سے پہلے

بوسہ خود دیتے ہیں اور خود ہی بگڑ جاتے ہیں

لطف فرماتے ہیں عاشق پہ جفا سے پہلے

خود بہ خود آتے ہیں وہ پاس یہ تاثیروں کا

جا لگا تیر نشانہ پہ دعا سے پہلے

قصد بوسہ ہی پہ دل پھانستے ہیں گیسو میں

پھانسی دیتے ہیں وہ مجرم کو خطا سے پہلے

وہ صنم اور کے حصہ میں نہ آتا اے عزیزؔ

مانگ لیتا جو اسے رو کے خدا سے پہلے

jan de denge karishmon pe qaza se pahle

mar hi jaenge tire naz-o-ada se pahle

raste hain zakhm-e-jigar qabl namak afshani

menh barasta hai mire ghar mein ghata se pahle

bosa khud dete hain aur khud hi bigar jate hain

lutf farmate hain ashiq pe jafa se pahle

khud ba khud ate hain wo pas ye tasiron ka

ja laga tir nishana pe dua se pahle

qasd-e-bosa hi pe dil phanste hain gesu mein

phansi dete hain wo mujrim ko khata se pahle

wo sanam aur ke hissa mein na ata ai aziz

mang leta jo use ro ke khuda se pahle