ہم پہ جور و ستم کے کیا معنی

ہم پہ جور و ستم کے کیا معنی

ترک رحم و کرم کے کیا معنی

عیش و عشرت سے غم کے کیا معنی

فربہی ہے درم کے کیا معنی

رات فرقت کی کس کو کہتے ہیں

روز ہجر صنم کے کیا معنی

گر نہیں اس کا ساغر مے ناب

کہئے پھر جام جم کے کیا معنی

پوجنا بت کا ہے یہ کیا مضمون

اور طواف حرم کے کیا معنی

کوچۂ گل رخاں کو کہتے ہیں

اور باغ ارم کے کیا معنی

یوں ہی وعدہ کرو یقیں ہو جائے

کیوں قسم لوں قسم کے کیا معنی

ماجرا چشم نم کا تو سمجھے

لیکن ابر و کرم کے کیا معنی

بوسے وعدہ سے کم نہیں منظور

دم نہ دو ہم کو دم کے کیا معنی

ایک دو تین چار پانچ چھ سات

یوں ہی گن لیں گے کم کے کیا معنی

اے سخیؔ یار نے دکھائی کمر

شب جو پوچھا عدم کے کیا معنی

ham pe jaur-o-sitam ke kya maani

tark-e-rahm-o-karam ke kya maani

aish-o-ishrat se gham ke kya maani

farbihi hai diram ke kya maani

rat furqat ki kis ko kahte hain

roz-e-hijr sanam ke kya maani

gar nahin us ka saghar-e-mai nab

kahiye phir jam-e-jam ke kya maani

pujna but ka hai ye kya mazmun

aur tawaf-e-haram ke kya maani

kucha-e-gul rukhan ko kahte hain

aur bagh-e-iram ke kya maani

yun hi waada karo yaqin ho jae

kyun qasam lun qasam ke kya maani

majra chashm-e-nam ka to samjhe

lekin abr-o-karam ke kya maani

bose waada se kam nahin manzur

dam na do ham ko dam ke kya maani

ek do tin char panch chhe sat

yun hi gin lenge kam ke kya maani

ai sakhi yar ne dikhai kamar

shab jo puchha adam ke kya maani