ہم نہ بت خانے میں نے مسجد ویراں میں رہے

ہم نہ بت خانے میں نے مسجد ویراں میں رہے

حسرت و آرزوئے جلوۂ جاناں میں رہے

خوں ہے وہ جس سے کہ ہو دامن قاتل رنگیں

خون فاسد ہے جو خالی سر مژگاں میں رہے

ہم نے مصنوع سے صانع کی حقیقت پائی

بے سبب ہم نہیں نظارۂ خوباں میں رہے

صبح خورشید کو دیکھا ہوس عارض میں

شام سے روشنیٔ شمع شبستاں میں رہے

توڑا زنار کو تسبیح کو پھینکا ہم نے

عشق رخ تھا ہوس نور درخشاں میں رہے

جا بجا ہم کو رہی جلوۂ جاناں کی تلاش

دیر و کعبہ میں پھرے صحبت رہباں میں رہے

خلوت دل کی نہ کچھ قدر کو سمجھے حاجی

طوف کعبہ کے لیے دشت و بیاباں میں رہے

ان اسیروں کو ہوئی قید تعین سے نجات

جو کہ پابند ترے گیسوئے پیچاں میں رہے

اس زمیں میں غزل اک اور بھی لکھو بہرامؔ

یہ دو غزلہ تو بھلا آپ کے دیواں میں رہے

ham na but khane main ne masjid-e-wiran mein rahe

hasrat-o-arzu-e-jalwa-e-janan mein rahe

khun hai wo jis se ke ho daman-e-qatil rangin

khun-e-fasid hai jo khali sar-e-mizhgan mein rahe

ham ne masnau se sane ki haqiqat pai

be sabab ham nahin nazara-e-khuban mein rahe

subh-e-khurshid ko dekha hawas-e-ariz mein

sham se raushni-e-sham-e-shabistan mein rahe

tora zunnar ko tasbih ko phenka ham ne

ishq-e-rukh tha hawas-e-nur-e-darakhshan mein rahe

ja baja ham ko rahi jalwa-e-janan ki talash

dair-o-kaaba mein phire sohbat-e-rahban mein rahe

khalwat-e-dil ki na kuchh qadr ko samjhe haji

tauf kaaba ke liye dasht-o-bayaban mein rahe

in asiron ko hui qaid-e-taayyun se najat

jo ke paband tire gesu-e-pechan mein rahe

is zamin mein ghazal ik aur bhi likho bahram

ye do ghazla to bhala ap ke diwan mein rahe