ہم پر ہے التفات ہمارے حبیب کا

ہم پر ہے التفات ہمارے حبیب کا

گیرا مگر نہیں ہے نفس عندلیب کا

اب وہ ہے جلوہ ریز لباسِ سپاس میں

جو عہدِ کودکی میں گلہ تھا ادیب کا

اچھا جو اس کو سونگھے تو آ جائے اس کو غش

اچھا اثر ہے زلفِ معنبر کی طیب کا

تیری گلی سے آگے نہ ہرگز ہوا چلے

کوچے سے تیرے پاؤں نہ اٹھے غریب کا

مصروف ہے بہت وہ ہمارے علاج میں

ہم بھی ذرا علاج کریں گے طبیب کا

تسلیم سے وفاق، رضا سے ہے اتفاق

نے چرخ کا گلہ، نہ گلہ ہے نصیب کا

ہم پاؤں پھونک پھونک کے رکھتے ہیں کیا کریں

اس بزم میں ہے دخل سراسر رقیب کا

ہو جائے کاسہ لیس شگرفانِ میکدہ

جس کو کہ اشتیاق ہے حالِ عجیب کا

سنتے ہی نام دشمنِ صد سالہ ہو گیا

پوچھا جو مجھ سے نام کسی نے حبیب کا

اس رشکِ گل نے لی ہے جو بلبل تو شیفتہ

دیکھے چمن میں شور کوئی عندلیب کا

ham par hai iltifat hamare habib ka

gira magar nahin hai nafas andalib ka

ab wo hai jalwa rez libas-e-sipas mein

jo ahd-e-kaudaki mein gila tha adib ka

achchha jo us ko sunghe to a jae us ko ghash

achchha asar hai zulf-e-muambar ki tib ka

teri gali se age na hargiz hawa chale

kuche se tere paon na uthe gharib ka

masruf hai bahut wo hamare ilaj mein

ham bhi zara ilaj karenge tabib ka

taslim se wifaq, raza se hai ittifaq

ne charkh ka gila, na gila hai nasib ka

ham paon phunk phunk ke rakhte hain kya karen

is bazm mein hai dakhl sarasar raqib ka

ho jae kasa les shagrafan-e-maikada

jis ko ke ishtiyaq hai hal-e-ajib ka

sunte hi nam dushman-e-sad sala ho gaya

puchha jo mujh se nam kisi ne habib ka

is rashk-e-gul ne li hai jo bulbul to shefta

dekhe chaman mein shor koi andalib ka