ہم جنس اگر ملے نہ کوئی آسمان پر

ہم جنس اگر ملے نہ کوئی آسمان پر

بہتر ہے خاک ڈالیے ایسی اڑان پر

آ کر گرا تھا کوئی پرندہ لہو میں تر

تصویر اپنی چھوڑ گیا ہے چٹان پر

پوچھو سمندروں سے کبھی خاک کا پتہ

دیکھو ہوا کا نقش کبھی بادبان پر

یارو میں اس نظر کی بلندی کو کیا کروں

سایہ بھی اپنا دیکھتا ہوں آسمان پر

کتنے ہی زخم ہیں مرے اک زخم میں چھپے

کتنے ہی تیر آنے لگے اک نشان پر

جل تھل ہوئی تمام زمیں آس پاس کی

پانی کی بوند بھی نہ گری سائبان پر

ملبوس خوش نما ہیں مگر جسم کھوکھلے

چھلکے سجے ہوں جیسے پھلوں کی دکان پر

سایہ نہیں تھا نیند کا آنکھوں میں دور تک

بکھرے تھے روشنی کے نگیں آسمان پر

حق بات آ کے رک سی گئی تھی کبھی شکیبؔ

چھالے پڑے ہوئے ہیں ابھی تک زبان پر

ham jins agar mile na koi asman par

behtar hai khak daliye aisi uran par

a kar gira tha koi parinda lahu mein tar

taswir apni chhor gaya hai chatan par

puchho samundaron se kabhi khak ka pata

dekho hawa ka naqsh kabhi badban par

yaro mein is nazar ki bulandi ko kya karun

saya bhi apna dekhta hun asman par

kitne hi zakhm hain mire ik zakhm mein chhupe

kitne hi tir ane lage ik nishan par

jal thal hui tamam zamin as pas ki

pani ki bund bhi na giri saiban par

malbus khush numa hain magar jism khokhle

chhalke saje hun jaise phalon ki dukan par

saya nahin tha nind ka ankhon mein dur tak

bikhre the raushni ke nagin asman par

haq bat a ke ruk si gai thi kabhi shakeb

chhale pare hue hain abhi tak zaban par