جاوداں غم عہد عشرت تیز پا

جاوداں غم عہد عشرت تیز پا

جانے کیا ہے زندگی کا مدعا

اٹھ رہے ہیں دم بہ دم طوفان غم

ایک دل ہے میں ہوں اور میرا خدا

ہے غم دل منزل آغاز میں

دیکھیے ہوتا ہے اب انجام کیا

حال دل پر آپ کیوں ہیں نوحہ گر

میں نے پائی ہے محبت کی سزا

ڈوبتی ہے میری کشتی ڈوب جائے

کون ہو منت پذیر ناخدا

آپ بھی آخر نہ میرے ہو سکے

اور اب کس سے ہو امید وفا

ہوشؔ میں ناآشنائے انتقام

اپنے دشمن کو بھی دیتا ہوں دعا

jawedan gham ahd-e-ishrat tez pa

jane kya hai zindagi ka muddaa

uth rahe hain dam ba dam tufan-e-gham

ek dil hai main hun aur mera khuda

hai gham-e-dil manzil-e-aghaz mein

dekhiye hota hai ab anjam kya

hal-e-dil par ap kyun hain nauha gar

main ne pai hai mohabbat ki saza

dubti hai meri kashti dub jae

kaun ho minnat pazir-e-nakhuda

ap bhi akhir na mere ho sake

aur ab kis se ho ummid-e-wafa

hosh mein naashna-e-intiqam

apne dushman ko bhi deta hun dua