ہم میکدے سے مر کے بھی باہر نہ جائیں گے

ہم میکدے سے مر کے بھی باہر نہ جائیں گے

میکش ہماری خاک کے ساغر بنائیں گے

وہ اک کہیں گے ہم سے تو ہم سو سنائیں گے

منہ آئیں گے ہمارے تو اب منہ کی کھائیں گے

کچھ چارہ سازی نالوں نے کی ہجر میں مری

کچھ اشک میرے دل کی لگی کو بجھائیں گے

وہ مثل اشک اٹھ نہیں سکتا زمین سے

جس کو حضور اپنی نظر سے گرائیں گے

جھونکے نسیم صبح کے آ آ کے ہجر میں

اک دن چراغ ہستیٔ عاشق بجھائیں گے

صحرا کی گرد ہوگی کفن مجھ غریب کا

اٹھ کر بگولے میرا جنازہ اٹھائیں گے

اب ٹھان لی ہے دل میں کہ سر جائے یا رہے

جیسے اٹھے گا بار محبت اٹھائیں گے

گردش نے میری چرخ کا چکرا دیا دماغ

نالوں سے اب زمیں کے طبق تھرتھرائیں گے

بیدمؔ وہ خوش نہیں ہیں تو اچھا یوں ہی سہی

ناخوش ہی ہو کے غیر مرا کیا بنائیں گے

ham maikade se mar ke bhi bahar na jaenge

maikash hamari khak ke saghar banaenge

wo ik kahenge ham se to ham so sunaenge

munh aenge hamare to ab munh ki khaenge

kuchh chara sazi nalon ne ki hijr mein miri

kuchh ashk mere dil ki lagi ko bujhaenge

wo misl-e-ashk uth nahin sakta zamin se

jis ko huzur apni nazar se giraenge

jhonke nasim-e-subh ke a a ke hijr mein

ik din charagh-e-hasti-e-ashiq bujhaenge

sahra ki gard hogi kafan mujh gharib ka

uth kar bagule mera janaza uthaenge

ab than li hai dil mein ke sar jae ya rahe

jaise uthega bar mohabbat uthaenge

gardish ne meri charkh ka chakra diya dimagh

nalon se ab zamin ke tabaq thartharaenge

bedam wo khush nahin hain to achchha yun hi sahi

nakhush hi ho ke ghair mira kya banaenge