ہم رنگ لاغری سے ہوں گل کی شمیم کا

ہم رنگ لاغری سے ہوں گل کی شمیم کا

طوفان باد ہے مجھے جھونکا نسیم کا

چھوڑا نہ کچھ بھی سینے میں طغیان اشک نے

اپنی ہی فوج ہو گئی لشکر غنیم کا

یاران نو کے واسطے مجھ سے خفا ہوئے

تم کو نہیں ہے پاس نیاز قدیم کا

یاد آئی کافروں کو مری آہ سرد کی

کیونکہ نہ کانپنے لگے شعلہ جحیم کا

ازبسکہ ثبت نامہ ہے سوز تپ دروں

قاصد کا ہاتھ ہے ید بیضا کلیم کا

واعظ کبھی ہلا نہیں کوئے صنم سے میں

کیا جانوں کیا ہے مرتبہ عرش عظیم کا

مارا ہے وصل غیر کے شکوہ پہ چاہیئے

مدفن جدا جدا مری لاش دو نیم کا

کہتا ہے بات بات پہ کیوں جان کھا گئے

گویا کہ پک گیا ہے کلیجہ ندیم کا

واعظ بتوں کو خلد میں لے جائیں گے کہیں

ہے وعدہ کافروں سے عذاب الیم کا

مومنؔ تجھے تو وہب ہے مومن ہی وہ نہیں

جو معتقد نہیں تری طبع سلیم کا

ham rang laghari se hun gul ki shamim ka

tufan-e-bad hai mujhe jhonka nasim ka

chhora na kuchh bhi sine mein tughyan-e-ashk ne

apni hi fauj ho gai lashkar ghanim ka

yaran-e-nau ke waste mujh se khafa hue

tum ko nahin hai pas-e-niyaz-e-qadim ka

yad ai kafiron ko miri ah-e-sard ki

kyunke na kanpne lage shola jahim ka

azbaskeh sabt nama hai soz-e-tap-e-darun

qasid ka hath hai yad-e-baiza kalim ka

waiz kabhi hila nahin ku-e-sanam se main

kya janun kya hai martaba arsh-e-azim ka

mara hai wasl-e-ghair ke shikwa pe chahiye

madfan juda juda miri lash do nim ka

kahta hai bat bat pe kyun jan kha gae

goya ke pak gaya hai kaleja nadim ka

waiz buton ko khuld mein le jaenge kahin

hai waada kafiron se azab-e-alim ka

momin tujhe to wahab hai momin hi wo nahin

jo motaqid nahin tiri tab-e-salim ka