ہم سمجھتے ہیں آزمانے کو

ہم سمجھتے ہیں آزمانے کو

عذر کچھ چاہیئے ستانے کو

سنگ در سے ترے نکالی آگ

ہم نے دشمن کا گھر جلانے کو

صبح عشرت ہے وہ نہ شام وصال

ہاے کیا ہو گیا زمانے کو

بوالہوس روئے میرے گریہ پہ اب

منہ کہاں تیرے مسکرانے کو

برق کا آسمان پر ہے دماغ

پھونک کر میرے آشیانے کو

سنگ سودا جنوں میں لیتے ہیں

اپنا ہم مقبرہ بنانے کو

شکوہ ہے غیر کی کدورت کا

سو مرے خاک میں ملانے کو

روز محشر بھی ہوش گر آیا

جائیں گے ہم شراب خانے کو

سن کے وصف اس پہ مر گیا ہمدم

خوب آیا تھا غم اٹھانے کو

کوئی دن ہم جہاں میں بیٹھے ہیں

آسماں کے ستم اٹھانے کو

نقش پائے رقیب کی محراب

نہیں زیبندہ سر جھکانے کو

چل کے کعبے میں سجدہ کر مومنؔ

چھوڑ اس بت کے آستانے کو

ham samajhte hain azmane ko

uzr kuchh chahiye satane ko

sang dar se tire nikali ag

ham ne dushman ka ghar jalane ko

subh ishrat hai wo na sham-e-wisal

hae kya ho gaya zamane ko

bawalhos roe mere girya pe ab

munh kahan tere muskurane ko

barq ka asman par hai dimagh

phunk kar mere ashiyane ko

sang sauda junun mein lete hain

apna ham maqbara banane ko

shikwa hai ghair ki kudurat ka

so mire khak mein milane ko

roz-e-mahshar bhi hosh gar aya

jaenge ham sharab khane ko

sun ke wasf us pe mar gaya hamdam

khub aya tha gham uthane ko

koi din ham jahan mein baithe hain

asman ke sitam uthane ko

naqsh-e-pae raqib ki mehrab

nahin zebinda sar jhukane ko

chal ke kaabe mein sajda kar momin

chhor us but ke astane ko