ہم جوں چکور غش ہیں اجی ایک یار پر

ہم جوں چکور غش ہیں اجی ایک یار پر

بلبل کی طرح جی نہیں دیتے ہزار پر

گر جی میں کچھ نہیں ہے تو دیکھے ہے کیوں مجھے

انگلی کو پھیر پھیر کے تیغے کی دھار پر

پا بوس یار کی ہمیں حسرت ہے اے نسیم

آہستہ آئیو تو ہمارے مزار پر

رخسار پر نمود ہوا خط خبر بھی ہے

یعنی کمر کسی ہے خزاں نے بہار پر

رنگیںؔ تو لے کے بیٹھے ہیں اسباب عیش سب

آوے بشرط یار بھی اپنے قرار پر

ham jun chakor ghash hain aji ek yar par

bulbul ki tarah ji nahin dete hazar par

gar ji mein kuchh nahin hai to dekhe hai kyun mujhe

ungli ko pher pher ke teghe ki dhar par

pa bos yar ki hamen hasrat hai ai nasim

ahista ayu to hamare mazar par

rukhsar par numud hua khat khabar bhi hai

yaani kamar kisi hai khizan ne bahar par

rangin to le ke baithe hain asbab-e-aish sab

awe bashart yar bhi apne qarar par