ہم آہوان شب کا بھرم کھولتے رہے

ہم آہوان شب کا بھرم کھولتے رہے

میزان دلبری پہ انہیں تولتے رہے

عکس جمال یار بھی کیا تھا کہ دیر تک

آئینے قمریوں کی طرح بولتے رہے

کیا کیا تھا حل مسئلۂ زندگی میں لطف

جیسے کسی کا بند قبا کھولتے رہے

پوچھو نہ کچھ کہ ہم سے غزالان بزم شب

کس شہر دلبری کی زباں بولتے رہے

کل شب تھا ذکر حور بھی ذکر بتاں کے ساتھ

زہد و صفا ادھر سے ادھر ڈولتے رہے

اپنا بھی وزن کر نہ سکے لوگ اور ہم

روح ورائے روح کو بھی تولتے رہے

سرمایۂ ادب تھی ہماری غزل ظفرؔ

اشعار نغز تھے کہ گہر رولتے رہے

ham ahuin shab ka bharam kholte rahe

mizan-e-dilbari pe unhen tolte rahe

aks-e-jamal-e-yar bhi kya tha ke der tak

aine qamariyon ki tarah bolte rahe

kya kya tha hal-e-masala-e-zindagi mein lutf

jaise kisi ka band-e-qaba kholte rahe

puchho na kuchh ke ham se ghazalan-e-bazm-e-shab

kis shahr-e-dilbari ki zaban bolte rahe

kal shab tha zikr-e-hur bhi zikr-e-butan ke sath

zohd-o-safa idhar se idhar dolte rahe

apna bhi wazn kar na sake log aur ham

ruh-e-warae ruh ko bhi tolte rahe

sarmaya-e-adab thi hamari ghazal zafar

ashar naghz the ke guhar rolate rahe