جان دیتے ہی بنی عشق کے دیوانے سے

جان دیتے ہی بنی عشق کے دیوانے سے

شمع کا حال نہ دیکھا گیا پروانے سے

آتش عشق سے جل جل گئے پروانے سے

پہلے یہ آگ لگی کعبہ و بت خانے سے

ساقیا گریۂ غم سے مجھے مجبور سمجھ

خون رستا ہے یہ ٹوٹے ہوئے پیمانے سے

رات کی رات چمن میں ہے نمود شبنم

صبح ہوتے ہی بکھر جائیں گے سب دانے سے

دم آخر تری آنکھوں کی بلائیں لے لوں

اور دم بھر جو نہ چھلکے مرے پیمانے سے

ہائے کیا چیز تھیں وہ مست نگاہیں شاعرؔ

جھومتا جھامتا نکلا ہوں پری خانے سے

jan dete hi bani ishq ke diwane se

shama ka hal na dekha gaya parwane se

atish-e-ishq se jal jal gae parwane se

pahle ye ag lagi kaaba-o-but khane se

saqiya girya-e-gham se mujhe majbur samajh

khun rasta hai ye tute hue paimane se

rat ki rat chaman mein hai numud-e-shabnam

subh hote hi bikhar jaenge sab dane se

dam-e-akhir tiri ankhon ki balaen le lun

aur dam bhar jo na chhalke mire paimane se

hae kya chiz thin wo mast nigahen shayar

jhumta jhamta nikla hun pari khane se