ہم تو اس کوچے میں گھبرا کے چلے آتے ہیں

ہم تو اس کوچے میں گھبرا کے چلے آتے ہیں

دو قدم جاتے ہیں پھر جا کے چلے آتے ہیں

ہم کو اے شرم ٹک اب اس کی طرف جانے دے

حال اپنا اسے دکھلا کے چلے آتے ہیں

دن کو زنہار ٹھہرتے نہیں ہم اس کو میں

رات کو ملنے کی ٹھہرا کے چلے آتے ہیں

وہ ادا کشتہ ٹھہرتا نہیں پھر مقتل میں

لاش کو جس کی وہ ٹھکرا کے چلے آتے ہیں

میں بھروسے ہی میں رہتا ہوں تری زلفوں میں

یار میرے مجھے پھنسوا کے چلے آتے ہیں

وہ جو ملتا نہیں ہم اس کی گلی میں دل کو

در و دیوار سے بہلا کے چلے آتے ہیں

جاتے ہیں کوچے میں ہم اس کے تو واں غیر کو دیکھ

پھر نہ آنے کی قسم کھا کے چلے آتے ہیں

قیدی مر جاتے ہیں جب آپ کبھی زنداں کے

قفل دروازے کو لگوا کے چلے آتے ہیں

چھٹتے ہیں جو اسیران قفس گلشن میں

کیا ہی پر شوق سے پھیلا کے چلے آتے ہیں

غیر جب وصل کا کرتا ہے سوال ان سے تو وے

کیسے محجوب ہو دم کھا کے چلے آتے ہیں

رہ روان سفر بادیۂ عشق اے وائے

قافلے راہ میں لٹوا کے چلے آتے ہیں

میں تو سمجھا تھا بجھاویں گے کچھ آنسو تف دل

یہ تو اور آگ کو بھڑکا کے چلے آتے ہیں

ساتھ میت کے مری وہ نہیں چلتے دو قدم

بس وہیں نعش کو اٹھوا کے چلے آتے ہیں

دل کی بیتابی سے جاتے تو ہیں ہم اس کو میں

لیک اس جانے سے پچھتا کے چلے آتے ہیں

بدرقہ گر نہیں احباب تو پھر کیوں پس مرگ

تا بہ منزل مجھے پہنچا کے چلے آتے ہیں

مصحفیؔ کے تئیں دیکھیں ہیں جو وہ کشتہ پڑا

پاس جاتے نہیں شرما کے چلے آتے ہیں

ham to us kuche mein ghabra ke chale ate hain

do qadam jate hain phir ja ke chale ate hain

ham ko ai sharm tuk ab us ki taraf jane de

hal apna use dikhla ke chale ate hain

din ko zinhar thaharte nahin ham us ko main

rat ko milne ki thahra ke chale ate hain

wo ada kushta thaharta nahin phir maqtal mein

lash ko jis ki wo thukra ke chale ate hain

main bharose hi mein rahta hun tiri zulfon mein

yar mere mujhe phanswa ke chale ate hain

wo jo milta nahin ham us ki gali mein dil ko

dar-o-diwar se bahla ke chale ate hain

jate hain kuche mein ham us ke to wan ghair ko dekh

phir na ane ki qasam kha ke chale ate hain

qaidi mar jate hain jab ap kabhi zindan ke

qufl-e-darwaze ko lagwa ke chale ate hain

chhutte hain jo asiran-e-qafas gulshan mein

kya hi par shauq se phaila ke chale ate hain

ghair jab wasl ka karta hai sawal un se to we

kaise mahjub ho dam kha ke chale ate hain

rah rawan-e-safar badiya-e-ishq ai wae

qafile rah mein lutwa ke chale ate hain

main to samjha tha bujhawenge kuchh ansu taf-e-dil

ye to aur ag ko bharka ke chale ate hain

sath mayyat ke miri wo nahin chalte do qadam

bas wahin naash ko uthwa ke chale ate hain

dil ki betabi se jate to hain ham us ko main

lek is jane se puchhta ke chale ate hain

badraqa gar nahin ahbab to phir kyun pas-e-marg

ta ba manzil mujhe pahuncha ke chale ate hain

mushafi ke tain dekhen hain jo wo kushta para

pas jate nahin sharma ke chale ate hain