ہزار مرتبہ دیکھا ستم جدائی کا

ہزار مرتبہ دیکھا ستم جدائی کا

ہنوز حوصلہ باقی ہے آشنائی کا

پری اٹھی مرے پہلو سے بارہا ناکام

فریفتہ ہوں تری طرز دل ربائی کا

مجھے عذاب جہنم کہ بت پرست ہوں میں

وہ بت بہشت میں دعویٰ جسے خدائی کا

فضائے باغ سے ہے گوشۂ قفس خوش تر

گر اپنے دل میں نہ ہو دغدغہ رہائی کا

ادب نہ وادئ وحشت کے مجھ سے ترک ہوئے

جنوں میں ہوش رہا ہے برہنہ پائی کا

نگاہ خندہ تغافل عتاب کہنہ ہوئے

نکال طرز نیا کوئی دل ربائی کا

بتوں کا سجدہ مری سر نوشت میں کب تھا

کہ عزم کعبہ کے در پر ہو جبہ سائی کا

اچک رہا ہے کھڑا بام عرش پر کم بخت

قلق ہے مجھ کو شہیدیؔ کی نارسائی کا

hazar martaba dekha sitam judai ka

hanoz hausla baqi hai ashnai ka

pari uthi mire pahlu se barha nakam

farefta hun tiri tarz-e-dil rabai ka

mujhe azab-e-jahannam ke but parast hun main

wo but bahisht mein daawa jise khudai ka

faza-e-bagh se hai gosha-e-qafas khush tar

gar apne dil mein na ho daghdagha rihai ka

adab na wadi-e-wahshat ke mujh se tark hue

junun mein hosh raha hai barahna pai ka

nigah khanda taghaful itab kohna hue

nikal tarz naya koi dil rabai ka

buton ka sajda miri sar nawisht mein kab tha

ke azm-e-kaaba ke dar par ho jubba sai ka

uchak raha hai khara bam-e-arsh par kam bakht

qalaq hai mujh ko shahidi ki narasai ka