ہم آپ ہی کو اپنا مقصود جانتے ہیں

ہم آپ ہی کو اپنا مقصود جانتے ہیں

اپنے سوائے کس کو موجود جانتے ہیں

عجز و نیاز اپنا اپنی طرف ہے سارا

اس مشت خاک کو ہم مسجود جانتے ہیں

صورت پذیر ہم بن ہرگز نہیں وے مانے

اہل نظر ہمیں کو معبود جانتے ہیں

عشق ان کی عقل کو ہے جو ماسوا ہمارے

ناچیز جانتے ہیں نا بود جانتے ہیں

اپنی ہی سیر کرنے ہم جلوہ گر ہوئے تھے

اس رمز کو ولیکن معدود جانتے ہیں

یا رب کسے ہے ناقہ ہر غنچہ اس چمن کا

راہ وفا کو ہم تو مسدود جانتے ہیں

یہ ظلم بے نہایت دشوار تر کہ خوباں

بد وضعیوں کو اپنی محمود جانتے ہیں

کیا جانے داب صحبت از خویش رفتگاں کا

مجلس میں شیخ صاحب کچھ کود جانتے ہیں

مر کر بھی ہاتھ آوے تو میرؔ مفت ہے وہ

جی کے زیان کو بھی ہم سود جانتے ہیں

ham ap hi ko apna maqsud jante hain

apne siwae kis ko maujud jante hain

ijz-o-niyaz apna apni taraf hai sara

is musht-e-khak ko ham masjud jante hain

surat pazir ham ban hargiz nahin we mane

ahl-e-nazar hamen ko maabud jante hain

ishq un ki aql ko hai jo masiwa hamare

nachiz jante hain na bud jante hain

apni hi sair karne ham jalwa gar hue the

is ramz ko walekin maadud jante hain

ya rab kise hai naqa har ghuncha is chaman ka

rah-e-wafa ko ham to masdud jante hain

ye zulm be nihayat dushwar tar ke khuban

bad wazaiyon ko apni mahmud jante hain

kya jane dab sohbat az khwesh raftagan ka

majlis mein shaikh sahab kuchh kud jante hain

mar kar bhi hath awe to mir muft hai wo

ji ke ziin ko bhi ham sud jante hain