ہم آپ کو تو عشق میں برباد کریں گے

ہم آپ کو تو عشق میں برباد کریں گے

تاثیر وفا پر تجھے کیا یاد کریں گے

یاں سخت دلوں میں نہیں ہم دم کوئی اپنا

جا کوہ میں فرہاد کو فریاد کریں گے

محروم نہ رکھے گا ہمیں عشق بتاں سے

گو داد نہ دیں کشتۂ بیداد کریں گے

اے دور فلک مجھ کو قسم سر کی ہے اپنے

ہم شاد کبھی یہ دل ناشاد کریں گے

گر سلسلۂ عشق میں فرزند خلف ہیں

ہم خانہ خرابی کا گھر آباد کریں گے

کب پیروی قیس کریں عشق و جنوں میں

اس فن میں کچھ اپنا ہی ہم ایجاد کریں گے

ہو حلقہ بگوش آہ و فغاں کا مری مجنوں

جب کان پکڑ یاد ہم استاد کریں گے

حسرتؔ یوں ہی آخر ہوئی یہ فصل بھی گل کی

کب کنج قفس سے ہمیں آزاد کریں گے

ham ap ko to ishq mein barbad karenge

tasir-e-wafa par tujhe kya yad karenge

yan sakht dilon mein nahin ham dam koi apna

ja koh mein farhad ko fariyad karenge

mahrum na rakhega hamen ishq-e-butan se

go dad na den kushta-e-bedad karenge

ai daur-e-falak mujh ko qasam sar ki hai apne

ham shad kabhi ye dil-e-nashad karenge

gar silsila-e-ishq mein farzand khalaf hain

ham khana kharabi ka ghar abad karenge

kab pairawi-e-qais karen ishq-o-junun mein

is fan mein kuchh apna hi ham ijad karenge

ho halqa bagosh ah-o-fughan ka miri majnun

jab kan pakar yad ham ustad karenge

hasrat yun hi akhir hui ye fasl bhi gul ki

kab kunj-e-qafas se hamen azad karenge