ہم آج کل ہیں نامہ نویسی کی تاؤ پر

ہم آج کل ہیں نامہ نویسی کی تاؤ پر

دن بھر کبوتروں کو بھگاتے ہیں باؤ پر

رندوں کو ایک روز تو دریا دلی دکھا

کشتیٔ مے کو چھوڑ دے ساقی بہاؤ پر

لکھوں وہ شعر عارض رنگیں کی وصف بیں

تختہ چمن کا صدقے ہوں کاغذ کی ناؤ پر

کچھ حاجت کباب نہیں کیف عشق میں

سیخیں دل و جگر کی لگیں ہیں الاؤ پر

بے منت جہان تنک ظرف اگر ملے

واللہ پھر تو چرب ہے خشکا پلاؤ پر

قانع کی منہ سے نعمت دنیا خفیف ہے

بھاری ہے پاؤ نان پر مری نان پاؤ پر

آفت نشان ہیں دیدۂ فتاں کی پتلیاں

تشہیر سامری کو کریں گے یہ گاؤ پر

بازیچہ گاہ عشق میں وہ ہوں قمار باز

دونوں جہان رکھ دیے ہیں ایک داؤ پر

کیوں کر براتیوں سے نہ گھونگھٹ کرے دلہن

ساری سبھا مٹی ہے تمہارے بناؤ پر

گل گشت کی ہوس چمنستاں کی آرزو

اے بے قراریو مرے دل کو لگاؤ پر

کرتا ہوں میں جو مرہم کافور کی تلاش

کرتی ہے چاندنی مری سینے کے گھاؤ پر

کشتیٔ مے لگی رہی ساقی لبوں کے گھاٹ

ہم مے کشوں کا قافلہ ہے چل چلاؤ پر

میں جل میں آ گیا وہ نہ آیا فریب میں

میں زد پہ چڑھ گیا وہ نہ ٹھیرا لگاؤ پر

پروانے کی طرح نہ بجھا دے چراغ حسن

طوطیٔ خط کے آتش رخ سے جلاؤ پر

علم سفینہ اس کو تجھے علم سینہ بحرؔ

تو پل پر اور شیخ ہے کاغذ کی ناؤ پر

ham aj kal hain nama nawisi ki tao par

din bhar kabutron ko bhagate hain bao par

rindon ko ek roz to dariya dili dikha

kashti-e-mai ko chhor de saqi bahao par

likhun wo sher ariz-e-rangin ki wasf bin

takhta chaman ka sadqe hun kaghaz ki nao par

kuchh hajat-e-kabab nahin kaif-e-ishq mein

sikhen dil-o-jigar ki lagen hain alao par

be minnat-e-jahan-e-tunuk zarf agar mile

wallah phir to charb hai khashka pilao par

qane ki munh se nemat-e-duniya khafif hai

bhari hai pao nan par miri nan pao par

afat nishan hain dida-e-fattan ki putliyan

tashhir-e-samri ko karenge ye gao par

bazicha gah-e-ishq mein wo hun qimar-e-baz

donon jahan rakh diye hain ek dao par

kyun kar baratiyon se na ghunghat kare dulhan

sari sabha mitti hai tumhare banao par

gul gasht ki hawas chamanistan ki arzu

ai be qarariyo mire dil ko lagao par

karta hun main jo marham-e-kafur ki talash

karti hai chandni miri sine ke ghao par

kashti-e-mai lagi rahi saqi labon ke ghat

ham mai kashon ka qafila hai chal chillao par

main jal mein a gaya wo na aya fareb mein

main zad pe charh gaya wo na thaira lagao par

parwane ki tarah na bujha de charagh-e-husn

tuti-e-khat ke atish-e-rukh se jalao par

ilm-e-safina us ko tujhe ilm-e-sina bahr

tu pal par aur shaikh hai kaghaz ki nao par