ہم اپنا جو قصہ سنانے لگے

ہم اپنا جو قصہ سنانے لگے

وہ بولے کہ پھر سر پھرانے لگے

کہا تھا اٹھا پردۂ شرم کو

وہ الٹا ہمیں کو اٹھانے لگے

ذرا دیکھیے ان کی صناعیاں

مجھے دیکھ کر منہ بنانے لگے

کہا میں نے مل یا مجھے مار ڈال

وہ جھٹ آستینیں چڑھانے لگے

مجھے آتے دیکھا جوں ہی دور سے

قدم وار جلدی اٹھانے لگے

اٹھے وہ تو اک حشر برپا کیا

جو بیٹھے تو فتنہ اٹھانے لگے

غذا غم میں تھی میری خون جگر

اب اعدا کا بھی رشک کھانے لگے

کمال تعشق نہیں ہے ہنوز

ابھی سے وہ منہ کو چھپانے لگے

خفا ہو کے جب بے بلائے گیا

مجھے دیکھ کر مسکرانے لگے

غنیمت ہے اتنا تو اٹھا حجاب

کہ اب خواب میں بھی وہ آنے لگے

وہ دل کے اڑانے سے واقف نہ تھے

ہمیں تو یہ گھاتیں بتانے لگے

مگر ان پہ راز محبت کھلا

جو مجروحؔ سے بچ کے جانے لگے

ham apna jo qissa sunane lage

wo bole ke phir sar pharane lage

kaha tha utha parda-e-sharm ko

wo ulta hamen ko uthane lage

zara dekhiye un ki sannaiyan

mujhe dekh kar munh banane lage

kaha main ne mil ya mujhe mar dal

wo jhat astinen charhane lage

mujhe ate dekha jun hi dur se

qadam war jaldi uthane lage

uthe wo to ik hashr barpa kiya

jo baithe to fitna uthane lage

ghiza gham mein thi meri khun-e-jigar

ab aada ka bhi rashk khane lage

kamal-e-taashshuq nahin hai hanoz

abhi se wo munh ko chhupane lage

khafa ho ke jab be bulae gaya

mujhe dekh kar muskurane lage

ghanimat hai itna to utha hijab

ke ab khwab mein bhi wo ane lage

wo dil ke urane se waqif na the

hamen to ye ghaten batane lage

magar un pe raz-e-mohabbat khula

jo majruh se bach ke jane lage