ہم ان کی نظر میں سمانے لگے

ہم ان کی نظر میں سمانے لگے

مگر جب نظر بھی نہ آنے لگے

یہ تیری سخن سازیاں ہیں ندیم

کسی پر وہ کیوں رحم کھانے لگے

نہ دی غیر نے داد طرز ستم

ستم گر کو ہم یاد آنے لگے

نہ دانش درست اور بینش بجا

دل و دیدہ دونوں ٹھکانے لگے

گیا تھا کہ ان کی خوشامد کروں

وہ الٹا مجھی کو بنانے لگے

کبھی خیر مقدم کبھی مرحبا

زباں پر یہ الفاظ لانے لگے

کبھی میرے قربان ہوتے رہی

کبھی مجھ کو پنکھا ہلانے لگے

کبھی لیٹ کر پاؤں پھیلا دیئے

کبھی دیکھ کر مسکرانے لگے

کیا میں نے جب عزم بوس و کنار

تو اٹھ بیٹھے اور منہ چڑھانے لگے

کہیں پھر دوپٹا سنبھلنے لگا

کہیں آدمی کو بلانے لگے

خدایا کیا کس نے ان پر ستم

الٰہی یہ کیوں غل مچانے لگے

وہ دم میں کب آتے تھے دیتے تھے دم

کہ سمجھوں مرے دم میں آنے لگے

وہ محفل میں آئیں تو ناظمؔ ضرور

مغنی یہ اشعار گانے لگے

ham un ki nazar mein samane lage

magar jab nazar bhi na ane lage

ye teri sukhan saziyan hain nadim

kisi par wo kyun rahm khane lage

na di ghair ne dad tarz-e-sitam

sitam gar ko ham yad ane lage

na danish durust aur benash baja

dil-o-dida donon thikane lage

gaya tha ke un ki khushamad karun

wo ulta mujhi ko banane lage

kabhi khair maqdam kabhi marhaba

zaban par ye alfaz lane lage

kabhi mere qurban hote rahi

kabhi mujh ko pankha hilane lage

kabhi let kar paon phaila diye

kabhi dekh kar muskurane lage

kiya main ne jab azm-e-bos-o-kanar

tu uth baithe aur munh charhane lage

kahin phir dopatta sambhalne laga

kahin admi ko bulane lage

khudaya kiya kis ne un par sitam

ilahi ye kyun ghul machane lage

wo dam mein kab ate the dete the dam

ke samjhun mire dam mein ane lage

wo mahfil mein aen to nazim zarur

mughanni ye ashar gane lage