ہلاک تیغ جفا یا شہید ناز کرے

ہلاک تیغ جفا یا شہید ناز کرے

ترا کرم ہے جسے جیسے سرفراز کرے

ہر ایک ذرہ ہے عالم کا گوش بر آواز

تو پھر کہاں پہ کوئی گفتگوئے راز کرے

تجلیاں جسے گھیرے ہوں تیرے جلوہ کی

وہ دیر و کعبہ میں کیا خاک امتیاز کرے

محال ترک خیال نجات ہے لیکن

وہ بے نیاز جسے چاہے بے نیاز کرے

مرے کریم جو بے مانگے تجھ سے پاتا ہو

وہ جا کے کیوں کہیں دست طلب دراز کرے

یہ حسن و عشق کا ہے اتحاد یک رنگی

وہی ہے مرضئ محمود جو ایاز کرے

بنائے زندۂ جاوید یا رکھے بیدمؔ

مرے سر آنکھوں پہ جو کچھ نگاہ ناز کرے

halak-e-tegh-e-jafa ya shahid-e-naz kare

tira karam hai jise jaise sarfaraz kare

har ek zarra hai alam ka gosh bar awaz

to phir kahan pe koi guftugu-e-raz kare

tajalliyan jise ghere hun tere jalwa ki

wo dair-o-kaaba mein kya khak imtiyaz kare

muhal tark-e-khayal-e-najat hai lekin

wo be niyaz jise chahe be niyaz kare

mire karim jo be mange tujh se pata ho

wo ja ke kyun kahin dast-e-talab daraz kare

ye husn-o-ishq ka hai ittihad-e-yak rangi

wahi hai marzi-e-mahmud jo ayaz kare

banae zinda-e-jawed ya rakhe bedam

mire sar ankhon pe jo kuchh nigah-e-naz kare