ہم تو کہتے تھے دم آخر ذرا سستا نہ جا

ہم تو کہتے تھے دم آخر ذرا سستا نہ جا

لے، چلے ہم جان سے، مختار ہے اب جا نہ جا

لے دل بے تاب آتا ہے وہ کر لے عرض حال

دیکھتے ہی اس کی صورت اس قدر گھبرا نہ جا

تنگ ہو کر کس ادا سے وصل کی شب کو وہ شوخ

مجھ سے کہتا تھا کہ ہے ہے اس قدر لپٹا نہ جا

پاس آنا گر نہیں منظور تو آ آ کے شکل

از رہ شوخی مجھے تو دور سے دکھلا نہ جا

جاؤں جاؤں کیا کہے ہے بس لڑائی ہو چکی

پیار سے میرے گلے اب جان جاں لگ جا نہ جا

کیا سماں رکھتا ہے وہ محفل سے اٹھنا یار کا

اور اشاروں سے مرا کہنا کہ آ جانا، نہ جا

کہتے ہیں آتا ہے وہ اے جان بر لب آمدہ

تو خدا کے واسطے ٹک اور بھی رہ جا نہ جا

روٹھ کر جب مجھ سے وہ جاتا ہے تو کر ضبط آہ

پہلے تو کہتا ہوں میں تو جان اب جا یا نہ جا

لیک اٹھ کر جب وہ جاتا ہے تو بے تابی سے میں

ووں ہی کہتا ہوں ترے قربان جاؤں آ، نہ جا

لوٹتا ہے جرأتؔ بیتاب جانے سے ترے

یوں اسے تڑپا کے تو اے شوخ بے پروا، نہ جا

ham to kahte the dam-e-akhir zara sasta na ja

le, chale ham jan se, mukhtar hai ab ja na ja

le dil-e-be tab ata hai wo kar le arz-e-hal

dekhte hi us ki surat is qadar ghabra na ja

tang ho kar kis ada se wasl ki shab ko wo shokh

mujh se kahta tha ke hai hai is qadar lipta na ja

pas ana gar nahin manzur to a a ke shakl

az rah-e-shokhi mujhe to dur se dikhla na ja

jaun jaun kya kahe hai bas larai ho chuki

pyar se mere gale ab jan-e-jan lag ja na ja

kya saman rakhta hai wo mahfil se uthna yar ka

aur isharon se mira kahna ke a jana, na ja

kahte hain ata hai wo ai jan-e-bar lab amada

tu khuda ke waste tuk aur bhi rah ja na ja

ruth kar jab mujh se wo jata hai to kar zabt ah

pahle to kahta hun main to jan ab ja ya na ja

lek uth kar jab wo jata hai to be tabi se main

wun hi kahta hun tire qurban jaun a, na ja

lautta hai jurat-e-betab jane se tire

yun use tarpa ke to ai shokh be parwa, na ja