ہزار جان سے صاحب نثار ہم بھی ہیں

ہزار جان سے صاحب نثار ہم بھی ہیں

تمہاری تیر نگہ کے شکار ہم بھی ہیں

ازل سے داخل فرد شمار ہم بھی ہیں

تمہارے چاہنے والوں میں یار ہم بھی ہیں

ہمیشہ ہم سے کدورت رہی حسینوں کو

نہ دل سے نکلے کبھی وہ غبار ہم بھی ہیں

مسافروں کی تواضع سے نام ہوتا ہے

کرم کرو کہ غریب الدیار ہم بھی ہیں

شراب پیتے ہیں تو جاگتے ہیں ساری رات

مدام عابد شب زندہ دار ہم بھی ہیں

ہزار بار حسینوں سے ہم نے نوک کی لی

گلوں کی آنکھ میں کھٹکے وہ خار ہم بھی ہیں

عجیب رتبہ عنایت کیا ہے قنبر کو

غلام یا شہ دلدل سوار ہم بھی ہیں

جنوں کے ہاتھ سے ہے ان دنوں گریباں تنگ

قبا پکارتی ہے تار تار ہم بھی ہیں

بڑے ہی چالیے ہیں چال چلتے ہیں ہر دم

وہ چوکتے نہیں پر ہوشیار ہم بھی ہیں

رقیب کو بھی ہے بار ان کی بزم میں آغاؔ

شریک صحبت بوس و کنار ہم بھی ہیں

hazar jan se sahab nisar ham bhi hain

tumhari tir-e-nigah ke shikar ham bhi hain

azal se dakhil fard-e-shumar ham bhi hain

tumhare chahne walon mein yar ham bhi hain

hamesha ham se kudurat rahi hasinon ko

na dil se nikle kabhi wo ghubar ham bhi hain

musafiron ki tawazo se nam hota hai

karam karo ke gharib alddiyar ham bhi hain

sharab pite hain to jagte hain sari rat

mudam abid-e-shab zinda dar ham bhi hain

hazar bar hasinon se ham ne nok ki li

gulon ki ankh mein khatke wo khar ham bhi hain

ajib rutba inayat kya hai qambar ko

ghulam ya shah-e-daldal sawar ham bhi hain

junun ke hath se hai in dinon gareban tang

qaba pukarti hai tar tar ham bhi hain

bare hi chaliye hain chal chalte hain har dam

wo chaukate nahin par hoshyar ham bhi hain

raqib ko bhi hai bar un ki bazm mein agha

sharik-e-sohbat bos-o-kanar ham bhi hain