ہر چند کہ دیکھے ہے وہ پیار کی آنکھوں سے

ہر چند کہ دیکھے ہے وہ پیار کی آنکھوں سے

پر نکلے ہے بے رنگی اس پار کی آنکھوں سے

شدت سے لگا ہنسنے احوال پہ گر میرے

آنسو بھی کبھی ٹپکے مکار کی آنکھوں سے

بے طاقتیٔ دل کا کیا شرح و بیاں کیجئے

بیماری نمایاں ہے بیمار کی آنکھوں سے

ہے تیغ نگہ کھینچے شمشیر بکف مژگاں

اب جیتے نہیں بچتے خوں خار کی آنکھوں سے

لاکھوں ہی کی آنکھوں سے آنکھوں تری بہتر ہیں

کیا اچھی ہیں اے پیاسے وہ چار کی آنکھوں سے

مت اہل دلوں سے کر ہم چشمی اے آئینے

غافل نہ ملا آنکھیں بیدار کی آنکھوں سے

ہر طرح سے دیکھا وہ دیکھ ہی لیتا ہے

تیاری کرے کیا کوئی عیار کی آنکھوں سے

اتنی بھی رسائی ہو ؔجوشش تو غنیمت ہے

خاک کف پا ملئے دل دار کی آنکھوں سے

har chand ke dekhe hai wo pyar ki ankhon se

par nikle hai be rangi us par ki ankhon se

shiddat se laga hansne ahwal pe gar mere

ansu bhi kabhi tapke makkar ki ankhon se

be taqati-e-dil ka kiya sharh-o-bayan kijiye

bimari numayan hai bimar ki ankhon se

hai tegh-e-nigah khinche shamshir bakaf mizhgan

ab jite nahin bachte khun khar ki ankhon se

lakhon hi ki ankhon se ankhon tiri behtar hain

kya achchhi hain ai pyase wo char ki ankhon se

mat ahl dilon se kar ham chashmi ai aine

ghafil na mila ankhen bedar ki ankhon se

har tarah se dekha wo dekh hi leta hai

tayyari kare kya koi ayyar ki ankhon se

itni bhi rasai ho joshish to ghanimat hai

khak kaf-e-pa miliye dil dar ki ankhon se