ہر دم آتے ہیں بھرے دیدۂ گریاں تجھ بن

ہر دم آتے ہیں بھرے دیدۂ گریاں تجھ بن

مجھ کو یہ ڈر ہے کہ لائیں نہ یہ طوفاں تجھ بن

لالہ و گل کی طرف کس کی بلا دیکھے ہے

جی کو بھاتی ہی نہیں سیر گلستاں تجھ بن

آ گیا بسکہ خلل مذہب و ملت میں مری

نہ رہا گبر میں پیارے نہ مسلماں تجھ بن

دل گیا دین گیا صبر گیا تاب گئی

یوں ہی اپنے تو ہوئے سیکڑوں نقصاں تجھ بن

نہ کھلے غنچۂ تصویر کے مانند کبھو

لب خاموش مرے اے گل خنداں تجھ بن

جب سے اے گل تو گیا بستر عاشق پہ ترے

گل بالیں نہ ہوئے سنبل و ریحاں تجھ بن

سامنے سے مری آنکھوں کے نہ جا مان کہا

کس کو دیکھوں گا میں پھر اے مہ تاباں تجھ بن

روز دشمن کا بھی اس طرح نہ کٹیو یارب

میں نے جس ظلم سے کاٹی شب ہجراں تجھ بن

مہ نو شام کے ہوتے ہی تصور میں ترے

تھا کھڑا سر پہ لیے خنجر عریاں تجھ بن

اور جو جاتی تھی کبھی خوشۂ پرویں پہ نگاہ

وہ بھی لگتا تھا صنم دستۂ پیکاں تجھ بن

مصحفیؔ جا کے گلستاں میں کرے کیا پیارے

کہ گلستاں ہے اسے خانۂ زنداں تجھ بن

har dam ate hain bhare dida-e-giryan tujh bin

mujh ko ye dar hai ke laen na ye tufan tujh bin

lala-o-gul ki taraf kis ki bala dekhe hai

ji ko bhati hi nahin sair-e-gulistan tujh bin

a gaya baske khalal mazhab-o-millat mein miri

na raha gabr mein pyare na musalman tujh bin

dil gaya din gaya sabr gaya tab gai

yun hi apne to hue saikron nuqsan tujh bin

na khule ghuncha-e-taswir ke manind kabhu

lab-e-khamosh mire ai gul-e-khandan tujh bin

jab se ai gul to gaya bistar-e-ashiq pe tire

gul-e-balin na hue sumbul-o-raihan tujh bin

samne se miri ankhon ke na ja man kaha

kis ko dekhunga mein phir ai mah-e-taban tujh bin

roz dushman ka bhi is tarah na katiyo yarab

main ne jis zulm se kati shab-e-hijran tujh bin

mah-e-nau sham ke hote hi tasawwur mein tire

tha khara sar pe liye khanjar-e-uryan tujh bin

aur jo jati thi kabhi khosha-e-parwin pe nigah

wo bhi lagta tha sanam dasta-e-paikan tujh bin

mushafi ja ke gulistan mein kare kya pyare

ke gulistan hai use khana-e-zindan tujh bin