ہر روز ہمیں گھر سے صحرا کو نکل جانا — غلام علی ہمدانی مصحفی (Mushafi Ghulam Hamdani)

ہر روز ہمیں گھر سے صحرا کو نکل جانا

کھیتوں کا مزہ لینا جنگل کو نکل جانا

جی کیوں نہ بھلا ان کی پھر بھوں پہ لگے اپنا

اک وسعت مشرب کے ہے ساتھ یہ ویرانا

سطح پہ زمیں کی ہے تاحد نظر سبزہ

کیا سیر کا عالم ہے اپنا ہے نہ بیگانا

ہم عشق حقیقی کے یہ رنگ سمجھتے ہیں

نے لیلیٰ نہ مجنوں ہے نے شمع نہ پروانا

جس حسن کے جلوے ہیں عارف کی نگاہوں میں

وہ حسن بناوے ہے کعبے کو صنم خانا

سائے میں مغیلاں کے بیٹھے گا یہ دیوانا

غربت کے بیاباں میں ہے مصحفیؔ آوارا

اے خضر خجستہ پے ٹک راہ تو بتلانا