ہر ذی حیات کا ہے سبب جو حیات کا

ہر ذی حیات کا ہے سبب جو حیات کا

نکلے ہے جی ہی اس کے لیے کائنات کا

بکھری ہے زلف اس رخ عالم فروز پر

ورنہ بناؤ ہووے نہ دن اور رات کا

در پردہ وہ ہی معنی مقوم نہ ہوں اگر

صورت نہ پکڑے کام فلک کے ثبات کا

ہیں مستحیل خاک سے اجزائے نو خطاں

کیا سہل ہے زمیں سے نکلنا نبات کا

مستہلک اس کے عشق کے جانیں ہیں قدر مرگ

عیسیٰ و خضر کو ہے مزہ کب وفات کا

اشجار ہوویں خامہ و آب سیہ بحار

لکھنا نہ تو بھی ہو سکے اس کی صفات کا

اس کے فروغ حسن سے جھمکے ہے سب میں نور

شمع حرم ہو یا کہ دیا سومنات کا

بالذات ہے جہاں میں وہ موجود ہر جگہ

ہے دید چشم دل کے کھلے عین ذات کا

ہر صفحے میں ہے محو کلام اپنا دس جگہ

مصحف کو کھول دیکھ ٹک انداز بات کا

ہم مذنبوں میں صرف کرم سے ہے گفتگو

مذکور ذکر یاں نہیں صوم و صلٰوۃ کا

کیا میرؔ تجھ کو نامہ سیاہی کا فکر ہے

ختم رسل سا شخص ہے ضامن نجات کا

har zi hayat ka hai sabab jo hayat ka

nikle hai ji hi us ke liye kainat ka

bikhri hai zulf us rukh-e-alam faroz par

warna banao howe na din aur rat ka

dar parda wo hi maani muqawwim na hun agar

surat na pakre kam falak ke sabat ka

hain masthil khak se ajza-e-nau khatan

kya sahl hai zamin se nikalna nabat ka

mustahlak us ke ishq ke janen hain qadr marg

isa-o-khizr ko hai maza kab wafat ka

ashjar howen khama-o-ab-e-siyah bihar

likhna na tu bhi ho sake us ki sifat ka

us ke farogh-e-husn se jhamke hai sab mein nur

sham-e-haram ho ya ke diya somnat ka

bilzzat hai jahan mein wo maujud har jagah

hai did chashm-e-dil ke khule ain-e-zat ka

har safhe mein hai mahw-e-kalam apna das jagah

mushaf ko khol dekh tuk andaz bat ka

ham muznibon mein sirf-e-karam se hai guftugu

mazkur zikr yan nahin saum-o-salwat ka

kya mir tujh ko nama siyahi ka fikr hai

khatm-e-rusul sa shakhs hai zamin najat ka