ہر حقیقت کو بانداز تماشا دیکھا

ہر حقیقت کو بانداز تماشا دیکھا

خوب دیکھا ترے جلووں کو مگر کیا دیکھا

جستجو میں تری یہ حاصل سودا دیکھا

ایک اک ذرہ کا آغوش طلب وا دیکھا

آئینہ خانۂ عالم میں کہیں کیا دیکھا

تیرے دھوکے میں خود اپنا ہی تماشا دیکھا

ہم نے ایسا نہ کوئی دیکھنے والا دیکھا

جو یہ کہہ دے کہ ترا حسن سراپا دیکھا

دل آگاہ میں کیا کہیے جگرؔ کیا دیکھا

لہریں لیتا ہوا اک قطرے میں دریا دیکھا

کوئی شائستہ و شایان غم دل نہ ملا

ہم نے جس بزم میں دیکھا اسے تنہا دیکھا

har haqiqat ko bandaz tamasha dekha

khub dekha tire jalwon ko magar kya dekha

justuju mein tiri ye hasil-e-sauda dekha

ek ik zarra ka aghosh-e-talab wa dekha

aina khana-e-alam mein kahen kya dekha

tere dhoke mein khud apna hi tamasha dekha

ham ne aisa na koi dekhne wala dekha

jo ye kah de ke tira husn-e-sarapa dekha

dil-e-agah mein kya kahiye jigar kya dekha

lahren leta hua ik qatre mein dariya dekha

koi shaista-o-shayan-e-gham-e-dil na mila

ham ne jis bazm mein dekha use tanha dekha