جانا کہ شغل رکھتے ہو تیر و کماں سے تم

جانا کہ شغل رکھتے ہو تیر و کماں سے تم

پر مل چلا کرو بھی کسو خستہ جاں سے تم

ہم اپنی چاک جیب کو سی رہتے یا نہیں

پھاٹے میں پاؤں دینے کو آئے کہاں سے تم

اب دیکھتے ہیں خوب تو وہ بات ہی نہیں

کیا کیا وگرنہ کہتے تھے اپنی زباں سے تم

تنکے بھی تم ٹھہرتے کہیں دیکھے ہیں تنک

چشم وفا رکھو نہ خسان جہاں سے تم

جاؤ نہ دل سے منظر تن میں ہے جا یہی

پچھتاؤ گے اٹھوگے اگر اس مکاں سے تم

قصہ مرا سنو گے تو جاتی رہے گی نیند

آرام چشم مت رکھو اس داستاں سے تم

کھل جائیں گی پھر آنکھیں جو مر جائے گا کوئی

آتے نہیں ہو باز مرے امتحاں سے تم

جتنے تھے کل تم آج نہیں پاتے اتنا ہم

ہر دم چلے ہی جاتے ہو آب رواں سے تم

رہتے نہیں ہو بن گئے میرؔ اس گلی میں رات

کچھ راہ بھی نکالو سگ و پاسباں سے تم

jana ke shaghl rakhte ho tir-o-kaman se tum

par mil chala karo bhi kisu khasta jan se tum

ham apni chak-e-jeb ko si rahte ya nahin

phate mein paon dene ko ae kahan se tum

ab dekhte hain khub to wo bat hi nahin

kya kya wagarna kahte the apni zaban se tum

tinke bhi tum thaharte kahin dekhe hain tunuk

chashm-e-wafa rakho na khasin jahan se tum

jao na dil se manzar tan mein hai ja yahi

pachhtaoge uthoge agar is makan se tum

qissa mira sunoge to jati rahegi nind

aram chashm mat rakho is dastan se tum

khul jaengi phir ankhen jo mar jaega koi

ate nahin ho baz mire imtihan se tum

jitne the kal tum aj nahin pate itna ham

har dam chale hi jate ho ab-e-rawan se tum

rahte nahin ho ban gae mir us gali mein rat

kuchh rah bhi nikalo sag-o-pasban se tum