گھر میں نظر آتی نہیں غم خوار کی صورت

گھر میں نظر آتی نہیں غم خوار کی صورت

تکتے ہیں پڑے ہم در و دیوار کی صورت

چھپتی ہی نہیں عشق کے بیمار کی صورت

کچھ اور ہی ہوتی ہے اس آزاد کی صورت

وعدے پہ بنائی تو ہے اقرار کی صورت

آنکھوں سے عیاں ہے مگر انکار کی صورت

جب وصل میں کچھ ہوتی ہے تکرار کی صورت

دل بیچ میں آ جاتا ہے دیوار کی صورت

کرتے ہیں کچھ اس شان سے وہ وصل کا وعدہ

اقرار کی صورت ہے نہ انکار کی صورت

کی دید کی خواہش تو وہ منہ پھیر کے بولے

دیکھے تو کوئی طالب دیدار کی صورت

محمودؔ کرم دیکھ کے زاہد نے سر حشر

یہ چاہا کہ بن جاؤں گنہ گار کی صورت

ghar mein nazar ati nahin gham khwar ki surat

takte hain pare ham dar-o-diwar ki surat

chhupti hi nahin ishq ke bimar ki surat

kuchh aur hi hoti hai is azad ki surat

waade pe banai to hai iqrar ki surat

ankhon se ayan hai magar inkar ki surat

jab wasl mein kuchh hoti hai takrar ki surat

dil bich mein a jata hai diwar ki surat

karte hain kuchh is shan se wo wasl ka waada

iqrar ki surat hai na inkar ki surat

ki did ki khwahish to wo munh pher ke bole

dekhe to koi talib-e-didar ki surat

mahmud karam dekh ke zahid ne sar-e-hashr

ye chaha ke ban jaun gunah gar ki surat