گھڑی گھڑی ہے ہمیں اپنے مہرباں کا خیال

گھڑی گھڑی ہے ہمیں اپنے مہرباں کا خیال

نہ کچھ زمیں کی خبر ہے نہ آسماں کا خیال

یہ بے خودی ہے کہ جس دن سے دل لگا بیٹھے

کہاں کا ہوش کہاں کی خبر کہاں کا خیال

اڑے ہوئے ہیں رقیبوں کے ہوش پہ اب تک

جو دل میں آپ کے آیا تھا امتحاں کا خیال

عدو سے ہنستے رہے رات بھر سر محفل

کیا نہ تم نے مرے چشم خوں فشا کا خیال

کسی کو دو نہ سر بزم بے دھڑک گالی

خدا کے واسطے رکھو ذرا زباں کا خیال

قدم جو بھول کے رکھیں رہ محبت میں

تو خضر کو بھی نہ ہو عمر جاوداں کا خیال

لگا نہ خلد میں بھی دل میں کیا بیاں کروں

وہاں بھی مجھ سے نہ چھوٹا ترے مکاں کا خیال

میں اس طرف کبھی رخ بھول کر نہیں کرتا

میں کیا بتاؤں جب آتا ہے پاسباں کا خیال

خدا کے واسطے مانو مرا کہا اے رنجؔ

خدا کے واسطے چھوڑو یہ ہے کہاں کا خیال

ghari ghari hai hamen apne mehrban ka khayal

na kuchh zamin ki khabar hai na asman ka khayal

ye be khudi hai ke jis din se dil laga baithe

kahan ka hosh kahan ki khabar kahan ka khayal

ure hue hain raqibon ke hosh pe ab tak

jo dil mein ap ke aya tha imtihan ka khayal

adu se hanste rahe rat bhar sar-e-mahfil

kiya na tum ne mire chashm-e-khun fasha ka khayal

kisi ko do na sar-e-bazm-e-be dharak gali

khuda ke waste rakho zara zaban ka khayal

qadam jo bhul ke rakhen rah-e-mohabbat mein

tu khizr ko bhi na ho umr-e-jawedan ka khayal

laga na khuld mein bhi dil mein kya bayan karun

wahan bhi mujh se na chhota tire makan ka khayal

main is taraf kabhi rukh bhul kar nahin karta

main kya bataun jab ata hai pasban ka khayal

khuda ke waste mano mira kaha ai ranj

khuda ke waste chhoro ye hai kahan ka khayal