گیا اب آفتاب حشر کا بھی جلوہ گر ہونا

گیا اب آفتاب حشر کا بھی جلوہ گر ہونا

شب فرقت ہماری ہے یہ کیا جانے سحر ہونا

وہاں جا کر مرے نالوں کا یا رب بے اثر ہونا

قیامت تھا کسی کا رات کو دشمن کے گھر ہونا

بہت اچھے ہیں جن پر ظلم ہوتے ہیں زمانے کے

اسی کو اہل دل کہتے ہیں منظور نظر ہونا

خیال اک نازنیں کا دل میں پھر رہ رہ کے آتا ہے

ذرا سینے میں اب تھم تھم کے او درد جگر ہونا

ہزاروں نیشتر پیوست ہوں جس کی رگ جاں میں

اسے دشوار ہے مرہون سعیٔ چارہ گر ہونا

یہ کیا کم ہے ملی قید قفس سے مجھ کو آزادی

میرے کام آ گیا آخر مرا بے بال و پر ہونا

بہت ہی عبرت انگیز اور حسرت خیز منظر ہے

لحد پر ایک بے کس کے کسی کا نوحہ گر ہونا

ارادے خشک زاہد حوض مے ہو جائیں گے خالی

کوئی آساں ہے اے صفدرؔ تیرے دامن کا تر ہونا

gaya ab aftab-e-hashr ka bhi jalwa gar hona

shab-e-furqat hamari hai ye kya jane sahar hona

wahan ja kar mire nalon ka ya rab be asar hona

qayamat tha kisi ka rat ko dushman ke ghar hona

bahut achchhe hain jin par zulm hote hain zamane ke

usi ko ahl-e-dil kahte hain manzur-e-nazar hona

khayal ik naznin ka dil mein phir rah rah ke ata hai

zara sine mein ab tham tham ke o dard-e-jigar hona

hazaron neshtar paiwast hun jis ki rag-e-jan mein

use dushwar hai marhun-e-sai-e-chara gar hona

ye kya kam hai mili qaid-e-qafas se mujh ko azadi

mere kam a gaya akhir mira be bal-o-par hona

bahut hi ibrat angez aur hasrat khez manzar hai

lahad par ek be kis ke kisi ka nauha gar hona

irade khushk zahid hauz-e-mai ho jaenge khali

koi asan hai ai safdar tere daman ka tar hona