گیا شباب نہ پیغام وصل یار آیا
مرزارضا برقگیا شباب نہ پیغام وصل یار آیا
جلا دو کاٹ کے اس نخل میں نہ بار آیا
قدم عدم میں یہ کہہ کر رکھوں گا اے قاتل
ہزار شکر کہ میں بار سر اتار آیا
مثال مہر وہ قاتل شعاع عارض سے
ہزار تیغ قضا کھینچے ایک بار آیا
اذاں دی کعبہ میں ناقوس دیر میں پھونکا
کہاں کہاں تجھے عاشق ترا پکار آیا
تری تلاش میں اے ماہ مثل ریگ رواں
نہ میری خاک کو بعد از فنا قرار آیا
پھنسا جو زلف میں چھوٹا وہ قید ہستی سے
رہا ہوا جو ترے دام میں شکار آیا
ہمیشہ دیکھ کے مجنوں کو خلق کہتی تھی
عدم سے برقؔ کی آمد ہے پیشکار آیا
gaya shabab na paigham wasl-e-yar aya
jala do kat ke is nakhl mein na bar aya
qadam adam mein ye kah kar rakhunga ai qatil
hazar shukr ke main bar-e-sar utar aya
misal-e-mehr wo qatil shua-e-ariz se
hazar tegh-e-qaza khinche ek bar aya
azan di kaaba mein naqus der mein phunka
kahan kahan tujhe ashiq tira pukar aya
tiri talash mein ai mah misl-e-reg-e-rawan
na meri khak ko baad az fana qarar aya
phansa jo zulf mein chhota wo qaid-e-hasti se
raha hua jo tire dam mein shikar aya
hamesha dekh ke majnun ko khalq kahti thi
adam se barq ki amad hai peshkar aya