الم کی حد ہے کہاں بے کسی کہاں تک ہے

الم کی حد ہے کہاں بے کسی کہاں تک ہے

ہمارے غم میں تمہاری خوشی کہاں تک ہے

بجا کہ پھول کی دو روزہ زندگی ہوگی

کلی سے کوئی یہ پوچھے کلی کہاں تک ہے

فرشتے سجدۂ تعظیم پر ہوئے مجبور

مرا نیاز مری بندگی کہاں تک ہے

نظر کا قصد ہی کب تھا ترے جمال کی دید

یہ دیکھنا تھا فقط روشنی کہاں تک ہے

درندگی کا مسلسل محاذ ہے قائم

یہ دیکھنے کے لئے آدمی کہاں تک ہے

تمہارے نام سے دنیا مجھے پکار اٹھی

تمہاری ذات سے وابستگی کہاں تک ہے

نیاز مندی کو احساس دیکھنا یہ ہے

مزاج حسن کی آشفتگی کہاں تک ہے

alam ki had hai kahan be kisi kahan tak hai

hamare gham mein tumhari khushi kahan tak hai

baja ke phul ki do roza zindagi hogi

kali se koi ye puchhe kali kahan tak hai

farishte sajda-e-taazim par hue majbur

mira niyaz miri bandagi kahan tak hai

nazar ka qasd hi kab tha tire jamal ki did

ye dekhna tha faqat raushni kahan tak hai

darindagi ka musalsal mahaz hai qaim

ye dekhne ke liye admi kahan tak hai

tumhare nam se duniya mujhe pukar uthi

tumhari zat se wabastagi kahan tak hai

niyaz mandi ko ehsas dekhna ye hai

mizaj-e-husn ki ashuftagi kahan tak hai