کوئی طوفاں تو نہیں کوئی تلاطم تو نہیں

کوئی طوفاں تو نہیں کوئی تلاطم تو نہیں

زندگی نام ہے جس کا وہ کہیں تم تو نہیں

اور کیا کہیے گا آئینۂ حیرت کے سوا

ان کی محفل میں مجھے اذن تکلم تو نہیں

جس طرف دیکھیے اک نور تجلی پیدا

آپ کی بزم میں شامل مہ و انجم تو نہیں

اور کیا دل کی تباہی پہ توجہ دیتا

آپ دیکھیں مرے ہونٹوں پہ تبسم تو نہیں

آئنہ دیکھ کے اب پیار سا آ جاتا ہے

میری صورت سے نمایاں یہ کہیں تم تو نہیں

موسم لالہ و گل عہد بہار گلشن

یہ کہیں آپ کا انداز تبسم تو نہیں

منزلیں اپنی جگہ پر ہیں طلب اپنی جگہ

جا ہی پہنچے گا کہ احساسؔ ابھی گم تو نہیں

koi tufan to nahin koi talatum to nahin

zindagi nam hai jis ka wo kahin tum to nahin

aur kya kahiyega aina-e-hairat ke siwa

un ki mahfil mein mujhe izn-e-takallum to nahin

jis taraf dekhiye ik nur-e-tajalli paida

ap ki bazm mein shamil mah-o-anjum to nahin

aur kiya dil ki tabahi pe tawajjoh deta

ap dekhen mire honton pe tabassum to nahin

aina dekh ke ab pyar sa a jata hai

meri surat se numayan ye kahin tum to nahin

mausam-e-lala-o-gul ahd-e-bahar-e-gulshan

ye kahin ap ka andaz-e-tabassum to nahin

manzilen apni jagah par hain talab apni jagah

ja hi pahunchega ke ehsas abhi gum to nahin