بے سبب عشق کب اداس رہا

بے سبب عشق کب اداس رہا

وہ تمہارا ادا شناس رہا

زندگی بھر خودی کا پاس رہا

عشق کب محو التماس رہا

ہر فسانہ جو کہہ چکی دنیا

میرے غم کا ہی اقتباس رہا

جامہ زیبی بقدر ذوق رہی

عشق ہر شخص کا لباس رہا

تم سے جب قربتیں میسر تھیں

دل تو اس وقت بھی اداس رہا

غم کا پیمانہ خود بتا دے گا

کون کتنا تمہارے پاس رہا

ان کو مجھ سے ہزار دوری تھی

میں تو احساسؔ ان کے پاس رہا

be sabab ishq kab udas raha

wo tumhara ada shanas raha

zindagi bhar khudi ka pas raha

ishq kab mahw-e-iltimas raha

har fasana jo kah chuki duniya

mere gham ka hi iqtibas raha

jama zebi baqadr-e-zauq rahi

ishq har shakhs ka libas raha

tum se jab qurbaten muyassar thin

dil to is waqt bhi udas raha

gham ka paimana khud bata dega

kaun kitna tumhare pas raha

un ko mujh se hazar duri thi

main to ehsas un ke pas raha