دل سے دل کے واسطے پیغام کیسے آ گیا

دل سے دل کے واسطے پیغام کیسے آ گیا

میرے ہونٹوں پر تمہارا نام کیسے آ گیا

ان کی محفل میں ہمارا نام کیسے آ گیا

آج ذکر گردش آیام کیسے آ گیا

دل سی شے نے کیسے رسم آرزو کر لی قبول

طائر افلاک زیر دام کیسے آ گیا

لوگ کہتے ہیں مسرت زندگی کا نام ہے

پھر یہ مجھ پر زیست کا الزام کیسے آ گیا

عشرت عہد گذشتہ کس طرح یاد آ گئی

ہاتھ میں آئینۂ ایام کیسے آ گیا

شیشۂ دل بسکہ نازک عشق کی مے تند و تیز

تم پہ الزام شکست جام کیسے آ گیا

فکر کے بادل جبین حسن پر احساسؔ کیوں

یہ سحر کے وقت ذکر شام کیسے آ گیا

dil se dil ke waste paigham kaise a gaya

mere honton par tumhara nam kaise a gaya

un ki mahfil mein hamara nam kaise a gaya

aj zikr-e-gardish-e-ayam kaise a gaya

dil si shai ne kaise rasm-e-arzu kar li qubul

tair-e-aflak zer-e-dam kaise a gaya

log kahte hain masarrat zindagi ka nam hai

phir ye mujh par zist ka ilzam kaise a gaya

ishrat-e-ahd-e-guzishta kis tarah yad a gai

hath mein aina-e-ayyam kaise a gaya

shisha-e-dil baske nazuk ishq ki mai tund-o-tez

tum pe ilzam-e-shikast-e-jam kaise a gaya

fikr ke badal jabin-e-husn par ehsas kyun

ye sahar ke waqt zikr-e-sham kaise a gaya