زمیں سے دور رہے آسماں سے دور رہے

زمیں سے دور رہے آسماں سے دور رہے

جو تم تھے پاس تو سارے جہاں سے دور رہے

جو اشک غم مژۂ خوں فشاں سے دور رہے

فسانہ بن گئے لفظ و بیاں سے دور رہے

وہ کیا بتائیں بہاروں کی حشر سامانی

جو طائران قفس گلستاں سے دور رہے

ستم ظریفیٔ فطرت وہ میر منزل ہیں

وہی جو گرد رہ کارواں سے دور رہے

گھٹا سکا نہ زمانہ دلوں کی قربت کو

تمہارے پاس رہے آستاں سے دور رہے

وہ دور اصل میں جان غزل سرائی تھا

وہ دور جس میں کہ ہم آشیاں سے دور رہے

نظر سے دوری کا احساسؔ اتنا غم تو نہ تھا

ملال یہ ہے دل دوستاں سے دور رہے

zamin se dur rahe asman se dur rahe

jo tum the pas to sare jahan se dur rahe

jo ashk-e-gham mizha-e-khun fishan se dur rahe

fasana ban gae lafz-o-bayan se dur rahe

wo kya bataen baharon ki hashr samani

jo tairan-e-qafas gulsitan se dur rahe

sitam zarifi-e-fitrat wo mir-e-manzil hain

wahi jo gard-e-rah karwan se dur rahe

ghata saka na zamana dilon ki qurbat ko

tumhare pas rahe astan se dur rahe

wo dur asl mein jan-e-ghazal sarai tha

wo dur jis mein ke ham ashiyan se dur rahe

nazar se duri ka ehsas itna gham to na tha

malal ye hai dil-e-dostan se dur rahe